Oza-Cesuras sacará a concesión a xestión da auga, ao verse incapaz de garantir un servizo de calidade

O concello de Oza-Cesuras levará ao próximo pleno un cambio no modelo da xestión da auga de parte do seu municipio, que asumía a administración local antes da fusión.

A intención do goberno é sacar o servizo a concesión por 9 anos, de tal forma que ambas as concesións terminen á vez, en 2027.

Segundo a memoria que levará a pleno, tal e como apunta A Opinión da Coruña, o executivo local recoñece que non dispón nin de material nin de persoal para poder afrontar o servizo con garantías, e máis cando hai detectadas verteduras frecuentes de empresas ao río onde captan a auga.

O goberno argumenta que "cos mesmos recursos, unha empresa especializada é máis eficiente na xestión da traída municipal de auga que unha Administración Local que non está prevista para prestar este servizo". Por tanto, observan que a modalidade de concesión permitirá ao concello reducir gastos de persoal, mantemento e conservación de infraestruturas.

O Executivo insiste ao longo de toda a proposta en que "seguirá mantendo a titularidade municipal do servizo e a potestade de control", pero esta situación é así en todos os municipios, aínda que ás veces se dea a entender o contrario desde visións interesadas na mal chamada 'remunicipalización'.