​A Valedora arquiva os expedientes contra Santiago polas persoas sen fogar

Martiño Noriega e Milagros Otero.

A Valedora do Pobo vén de comunicar ao Concello de Santiago a súa decisión de "arquivar todos os expedientes que tiña abertos en relación á situación das persoas sen fogar en Compostela", tal e como deu a coñecer o consistorio santiagués.

Eses expedientes referíanse a tres escritos de queixa, que argumentaban que o comportamento destas persoas era contrario á ordenanza municipal de convivencia.

A Valedora do Pobo adopta esta decisión argumentando que coñeceu por sentenza xudicial que "os servizos sociais do Concello interviñeron na información da situación e nas medidas de apoio" en relación á única persoa sen fogar que seguía sendo obxecto das queixas recibidas. Esta persoa fora ingresada nun centro sanitario por orde xudicial, tras a mediación dos servizos sociais do Concello.

POLÉMICA

Estes expedientes foran polémicos no seu momento, pola repercusión que colleran. E é que Martiño Noriega chegara a criticar un "sesgo evidente no proceder" da Valedora en relación a Santiago, acusando á responsable de non estar sendo "respectuosa" coa cidade.

E é que sinalara que a institución equiparara "a nivel comunicativo" as "máis de 50.000 queixas" que houbo sobre a sanidade pública e as listas de espera con "dúas queixas" recibidas pola situación das persoas sen fogar. "Ás veces estou por pedir amparo á valedora contra a valedora", chanceara o alcalde.

TRATAMENTO MEDIÁTICO

A Concellaría de Políticas Sociais tamén ten presentado un escrito diante do Colexio Profesional de Xornalistas de Galicia en relación ao tratamento informativo que algún medios de comunicación lle dero a este asunto, sobre todo ás persoas sen fogar e ás situación de pobreza, vulnerabilidade e exclusión social.