Feijóo, obrigado a render contas sobre o veto ao traspaso da AP-9

|

Xuntaportavocesparlamento


O presidente da Xunta deberá render contas no próximo pleno sobre o veto imposto polo Goberno ao debate en relación á transferencia da AP-9 a Galicia, así como explicar que medidas poñerá en marcha para sortear esta circunstancia.


Por ese asunto interesaranse os tres grupos da oposición, tal e como explicitaron en senllas roldas de prensa ao termo da reunión de portavoces na que se fixa a orde do día da sesión plenaria da semana próxima.


FEIJÓO, SEN VACACIÓNS


En primeiro termo, a representante do BNG, Ana Pontón, englobará a súa pregunta a Feijóo nun marco xenérico de "balance" do seu goberno nos últimos meses e recomendaralle cancelar "as súas vacacións" á vista de que a súa actuación merece "un suspenso coma unha catedral".


Tras enumerar os seus "suspensos" en "protección social, dereitos, política forestal", elevou o ton ao poñer un "moi deficiente" a este goberno "en defensa dos intereses de Galicia fronte ao Estado". "Co financiamento, a modernización do ferrocarril, o sistema enerxético" e tamén "coa AP-9".


"DOBRE POSICIÓN" DO PP


A continuación, o socialista Xoaquín Fernández Leiceaga censurou a "dobre posición" do PP en Galicia e en Madrid, que relacionou coa "estratexia" de Feijóo de poñerse de lado das "posicións maioritarias" nesta comunidade sabendo que o seu partido impoñerá "un bloqueo".


Tanto é así, profundou, que "os mesmos que provocan esta dobre posición" decidiron crear unha comisión de coordinación da autoestrada e "vense regularmente" para "discutir que facer" con ela.


En lugar desa comisión, o portavoz parlamentario do PSdeG requiriu a transferencia da titularidade da mencionada vía, a fin de poder dotala dunha "xestión razoable" e dun sistema de peaxes máis equilibrado.


"ARGUCIAS PARA EVITAR O DEBATE"


En representación de En Marea, o seu viceportavoz, Antón Sánchez, reprobou as "argucias para evitar o debate" sobre o traspaso desta infraestrutura postas en marcha polo PP, aínda que sostivo que non lle "sorprende" dada a "baixa catadura moral democrática" da formación conservadora.


"Pedimos contundencia. Non só pola transferencia, senón por defender a democracia", abundou, crítico con que o Goberno "utilice a mentira e a falsidade" nun informe encamiñado a vetar o debate dunha normativa.


"FUNDAMENTAL" CUMPRIR A LEI


Por parte do PPdeG, o seu portavoz, Pedro Puy, replicou á oposición que "o máis efectivo e democrático" en caso de "conflito" co Executivo estatal é seguir "as canles legais" e non "plantarse" ou "acampar fronte á Moncloa".


"O cumprimento da lei é fundamental", mantivo, para observar que esas apelacións para resolver a cuestión no marco político "lembran a outras latitudes".

relacionada O PPdeG enfrontaranse ao Goberno polo veto ao traspaso da AP-9
relacionada O Goberno central volve vetar a tramitación da transferencia da AP-9

Sen comentarios

Escribe o teu comentario




He leído y acepto la política de privacidad

No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress