A cooperativa agraria Copagro anuncia o seu peche "no seu mellor momento"

A Unión Sindical Obreira (USO) denunciou este martes que a cooperativa agraria Copagro, situada en Valdoviño, na comarca de Ferrol, presentou un ERE de extinción para os seus 16 traballadores "no seu mellor momento".

|

A Unión Sindical Obreira (USO) denunciou este martes que a cooperativa agraria Copagro, situada en Valdoviño, na comarca de Ferrol, presentou un ERE de extinción para os seus 16 traballadores "no seu mellor momento".


Copagro

Planta de Copagro en Valdoviño


Segundo lamentou o coordinador da Federación de Industria de USO-Galicia, Francisco Cousillas, a cooperativa comunicou o seu peche "totalmente por sorpresa, despois de ampliar o seu persoal nun 40% nos últimos anos e investir un millón de euros no último ano para converter á fábrica de pensos nunha empresa punteira en Galicia".


Tal como asegurou a organización sindical nun comunicado, Copagro está participada polas cooperativas de Meirás, quen designou aos administradores.


Así, nos últimos meses, "a cooperativa comprou tres camións, instalou unha aplicación informática nova e construíu unha planta para pensos porcinos", na que, segundo datos de USO, investiu 80.000 euros en maquinaria "que non se chegou nin sequera a montar por orde do seu presidente".


"SEN PREVIO AVISO"

"De súpeto e sen previo aviso, preséntase un ERE para cesar a actividade dunha fábrica que tanto os traballadores como o noso sindicato, o único representado na Cooperativa, vemos non só competitiva, senón con proxección de futuro", criticou Cousillas.


Neste sentido, USO sinalou que Copagro move ao ano unhas 19.000 toneladas de mercadoría, "non ten débedas cos seus provedores e aos traballadores unicamente débelle os atrasos de convenio", o que, segundo Cousillas, "abunda no inexplicable do peche, sen exporse sequera unha venda da unidade produtiva que garanta a actividade e o futuro dos empregos".


Desta maneira, os traballadores solicitaron a documentación que sustente o ERE, "pero as únicas contas que recibiron son as de 2017, o que fai sospeitar de que as de 2018 poderían conter irregularidades".


Por todo iso, o persoal convocou unha concentración este mércores, de 12,00 horas a 13,00 horas, diante da Cooperativa de Meirás. "Queremos documentación que xustifique o peche e os despedimentos e se é tan rendible como todo fai indicar, esixiremos que se manteña a actividade", sentenciou o representante sindical.


Sen comentarios

Escribe o teu comentario




He leído y acepto la política de privacidad

No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal - Política de Cookies - Política de Privacidade - Configuración de cookies - Consello editorial - Publicidade
Powered by Bigpress
CLABE