Alfonso Rueda dá por boa a "prioridade nacional" exposta por PP e Vox: "É de sentido común"

A polémica polos acordos entre PP e Vox baixo o paraugas da tan cacareada "prioridade nacional" chegou este luns até San Caetano, preguntado ao presidente da Xunta de Galicia, Alfonso Rueda, na súa comparecencia ante os medios despois da celebración do último Consello da Xunta. 

NO MARCO DE MÁIS ELECCIÓNS E PACTOS

Ante o atril e os xornalistas, Rueda foi cuestionado polo acordo, dando o seu aval ao principio de "prioridade nacional" que figura en pactos de investidura como os de Estremadura e Aragón e xusto no marco dunhas eleccións en Andalucía onde Juanma Moreno Bonilla non ten garantida unha maioría absoluta da que si goza o dirixente galego tras as eleccións celebradas en febreiro de 2024. 

A xuízo de Rueda, que apelou á súa "percepción, existe "unha maioría moi ampla" de cidadáns que cren que "levar tempo" e "cotizando" en España debe ser o criterio para esa prioridade nacional que, di, resulta "de sentido común".

"Respecto da prioridade nacional, sinceramente, a miña percepción, a miña sensación, é que unha maioría moi ampla dos españois e dos galegos están de acordo en que levar tempo aquí, tempo cotizando, contribuíndo e convivindo, é algo que está moi ben que se valore fronte aos que acaban de chegar agora mesmo", recoñeceu o presidente da Xunta, sen entrar a valorar as diferentes interpretacións que fan desde PP e Vox a esa priporidad. 

No entanto, Rueda si puntualizou que baixo esa defensa "non quere dicir que non haxa que atender a todo o mundo e favorecer a integración ao máximo". "Pero levar tempo aquí, tempo cotizando, contribuíndo e formando parte da comunidade, si é algo a ter en conta. Creo, na miña opinión, que é de sentido común", esgrime.