Posible venda do Centro Galego a unha empresa privada de saúde que aspira a dar servizo a toda a emigración

O Boletín Oficial da República Arxentina acaba de convocar a Asembla de Socios do Centro Galego de Buenos Aires. Na orde do día, inclúe a aprobación da venda do histórico inmoble de Belgrano, sede e principal activo da máis importante das institucións da emigración galega.

Unha pasada manifestación de traballadores do Centro Galego

A decisión do Goberno arxentino de convocar a Asemblea de Socios indica que hai posibilidades de dar luz verde a unha oferta do grupo privado Ribeira Saúde.

Segundo o texto da oferta, publicado polo presidente en funcións, Ribeira Saúde prometería "velar e potenciar os órganos institucionais do Centro Galego e o seu patrimonio cultural, negociando con todas as partes implicadas".

Isto é moi relevante politicamente en España, dado que o Centro atesoura a maior pinacoteca privada de artistas galegos do século XX e miles de volumes, patrimonio que ten un valor impagable para Galicia e que o Parlamento acordou protexer.

A orde do día tamén inclúe a aprobación das contas dos últimos anos e unha posible declaración de o concurso de acredores. O Centro leva anos arrastrando unha gran crise financeira que o conduciu á intervención e a unha situación próxima á desaparición definitiva.

A Asemblea está convocada para o 9 de maio. Non será fácil que a venda salga adiante. De feito, é a terceira vez que a intervención do polemico Martín Moyano convoca aos socios e nas dúas ocasións previas deu marcha atrás.

As condicións de Ribeira Saúde implican que Arxentina e España cooperen. O país suramericano debería condonar a enorme débeda en cotizacións coa Seguridade Social e outras entidades públicas que arrastra o Centro, así como facilitar a modernización do hospital e a súa entrada en servizo para o PAMI, un programa de saúde público para xubilados e ex-combatentes. 

Ribeira Saúde tamén espera que o Centro preste servizos para a obra social dos emigrantes españois, Ospaña. É máis, segundo o presidente electo dos socios, Ramón Suárez, Ribeira Saúde aspira á "asunción da explotación" de Ospaña, obra social que creo o Estado Español para garantir prestación sanitaria á diáspora arxentina. 

De asumir esta "explotación", Ribeira Saúde faría un gran negocio, dada a numerosa e envellecida colonia española en Arxentina. Ribeira Saúde está controlado por capital de Estados Unidos, pero ata hai pouco estaba controlada polo Banco Santander, e ten unha relevante presenza no sector sanitario privado español, sobre todo en Levante.