Afástase unha das dúas táboas de salvación para o Centro Galego de Buenos Aires

|

Das dúas ofertas que había polo Centro Galego de Buenos Aires, polo menos unha parece esfumarse. É a do grupo Ribeira Salud, que non se concreta, segundo informaron a Galiciapress fontes conecedoras das negociacións.



Raúl e alejandro olmos

Raúl e Alejandro Olmos, do grupo Basea Saúde


Moi malas noticias para os socios desta histórica institución, pois Ribera Salud era o único que, en principio, consideraba a opción de comprar o hospital. O consecuente ingreso de diñeiro serviría para pagar as enormes débedas cos traballadores e salvar o importantísimo legado cultural. Ribera é unha empresa con intereses en Arxentina e España, pero con capital controlado polo fondo de EE.UU. Centene.


A outra proposta é, en principio, menos atractiva. Basa Saúde só ofrece levar a xerencia do vetusto hospital, sobre o cal existen moitísimas dúbidas da súa viabilidade sen un millonario investimento. Basa está dirixida polos empresarios arxentinos Raúl e Alejandro Olmos, con intereses no sector sanitario e en medios de comunicación.


Así as cousas, e tras unha "decepcionante" reunión esta semana, a situación segue estancada. Non hai data para unha Asemblea, prevista inicialmente para principios de ano e suspendida finalmente. 


É a Asemblea quen, no seu caso, ten que autorizar a venda. Non poden facelo nin o polémico xerente, Martín Moyano, nomeado polo Goberno arxentino tras intervir o Centro ; nin a directiva elixida polos socios, entre outras cousas porque non tomou posesión. 


O presidente Ramón Suárez OuMuxo sigue negándose e asumir o cargo mentres as administracións españolas e arxentinas non garantan unha saída, que inclúa o pago dos salarios debidos por centos de traballadores e a prestación de servizos sanitarios para sempre aos 4.000 socios aproximadamente que resisten tras lustros de naufraxio.


Por outra banda, Galiciapress confirmou con varias fontes próximas ao Centro Galego que non hai procesos xudiciais abertos contra o xerente por malversación, como informaron algúns medios españois.


De acordo a estas fontes, é certo que hai tempo Moyano foi denunciado na Xustiza por malversación por varios socios. Agora ben, esas denuncias foron desestimadas xa hai bastante, aínda que algúns considérano executor dunha estratexia de "vaciamento" do Hospital para rematar co Centro e facilitar unha operación inmobiliaria . O xerente contraatacou con denuncias por difamación contra os acusadores. É esta parte do conflito xudicial a que está pendente de resolución. 


A pesar de que o cargo nomeado por Arxentina non está baixo investigación xudicial, o Goberno de España enarbora os preitos como escusa para seguir lavándose as mans, pois "evidentemente non ten marxe algún de intervención nisto".


Son palabras dunha resposta parlamentaria ao deputado no Congreso Miguel Anxo Martín Vello. Na súa contestación ao político de En Marea (ANOVA), o Estado non se move un chisco da súa postura: hai interese por preservar o patrimonio cultural e contactos coa administación arxentina para este fin pero non se vai mover un dedo para sacar ao Centro Galego da súa ruína económica e rescatar o hospital, pois a diáspora xa está cuberta a través dos seguros que ofrece a Fundación Ospaña. 


Postura inmovilista que, por certo, a pesar das distancias ideolóxicas e ao clima de enfrontamento vixente entre San Caetano e Moncloa, é moi similar á que mantén a Xunta.


 Fontes da dirección electa arremeten contra a Administración estatal por protexer á cúpula de Ospaña e non atender a súa petición, reintegrar ao Centro Galego a súa representación nos órganos de dirección da Fundación.


E é que en Ospaña están parte dos 120.000 socios que no seu día chegou a ter o Centro. Como ten músculo financeiro e apoio político, a reintegración da directiva do Centro no seu órgano de goberno sería unha das patas para reflotar un barco que se afunde cada vez máis. Pero para iso necesítase un esforzo político que, polo oído de Xunta e Estado, non hai interese en acometer.


 

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress