Profesionais do SERGAS da Coruña denuncian caos e falta de medios

A Comisión de Centro do Complexo Hospitalario Universitario A Coruña (Chuac) denunciou unha situación "caótica" nas unidades de hospitalización e do seu servizo de urxencias, que a xerencia nega.

Unha pasada protesta sindical no hospital da Coruña

Nun comunicado, a Comisión de Centro asegura que o complexo hospitalario ten "falta de camas todo o ano" e que tanto os hospitais do Chuac como o seu servizo de Urxencias "están durante todo o ano ao límite da súa capacidade polo que o incremento na afluencia de pacientes e na demanda de camas asegura un colapso xeneralizado", sinala ante a presenza de máis enfermos nestas datas.

Por outra banda, indica que o incremento da demanda "non é un feito puntual". "É unha realidade epidemiolóxica, polo menos, dous meses do período invernal". Por iso, esixe "un reforzo inmediato" en todas as unidades hospitalarias e do servizo de urxencias.

100% DE CAMAS OPERATIVAS, SEGUNDO A XERENCIA

Por parte da Xerencia de Xestión Integrada da Coruña, afirman que o Chuac ten operativas "o 100% das camas de todos os centros que compoñen o complexo hospitalario".

"E reforzouse o persoal médico e de enfermería tanto nos servizos de medicina interna como de urxencias", precisan en resposta ao comunicado da Comisión de Centro.

Con todo, recoñece, pola chegada do inverno, "un aumento da patoloxía respiratoria e a descompensación dos pacientes con patoloxías crónicas", pero engade que, a pesar diso, "a calidade asistencial está garantida".

Na mesma liña, indica que "todas as camas están habilitadas" e que se levaron a cabo reforzos como a incorporación de seis facultativos, cinco enfermeiras e cinco auxiliares "en diferentes áreas e quendas estratéxicas".