A calima africana enturba o aire en Galicia e reduce a súa calidade a niveis “regulares”

O fenómeno, frecuente na Península durante os últimos invernos, débese a un fluxo de aire cálido do Sahara que transporta po desde o deserto. Meteogalicia advertía onte da intrusión de masas de aire africano que podería incrementar notablemente os niveis de partículas en suspensión, afectando tanto á visibilidade como á calidade do aire.

As estacións de medición reflicten o empeoramento máis notable na zona atlántica e o interior da Coruña e Pontevedra. En menor medida, tamén se detectou unha baixada da calidade do aire na parte sur de Lugo e no noroeste de Ourense, aínda que os niveis aínda non alcanzan valores de risco para a saúde, segundo as autoridades ambientais.

Desde a Consellería de Medio Ambiente advirten que as persoas con afeccións respiratorias, os nenos e os maiores son os máis vulnerables a este tipo de episodios, recomendando limitar as actividades ao aire libre e manter unha correcta ventilación en vivendas e centros educativos.

Po en suspensión en toda a Península

Os modelos da Axencia Estatal de Meteorología (AEMET) prevén que esta intrusión de po sahariano afecte non só ao noroeste peninsular, senón ao conxunto do Estado. Para este 4 de marzo, as concentracións de po en superficie poderían oscilar entre 5 e 200 microgramos por metro cúbico no noroeste, norte e centro da Península. No sueste, estes valores poderían ser moi superiores, alcanzando até 500 µg/m³.

O modelo SKIRON tamén anticipa que podería producir depósito seco de po sobre case toda a superficie peninsular, incluídas as illas Baleares e as Canarias, o que se traducirá nunha fina capa arroxada sobre coches, tellados e mobiliario urbano. Ademais, poderíanse rexistrar precipitacións con deposición húmida de po nalgunhas zonas do sur e este peninsular ao longo do día. 

Nos últimos anos, Galicia rexistrou varios episodios de incursión de po africano, especialmente entre os meses de inverno e primavera, cando os cambios de circulación atmosférica facilitan a chegada de masas de aire cálido desde o Sahara. En marzo de 2022, un fenómeno similar tinguiu de ocre os ceos galegos e reduciu drasticamente a visibilidade.

Polo momento, Meteogalicia mantén a vixilancia activa sobre a evolución da calima e non descarta que o episodio se prolongue tamén durante o 5 de marzo, con concentracións similares de partículas, antes de que unha fronte atlántica axude a limpar o aire durante o fin de semana. 

O po sahariano seguirá presente polo menos durante as próximas 48 horas, segundo os modelos meteorolóxicos, ata que un cambio de ventos desde o Atlántico devolva a normalidade á atmosfera galega.