Segue a baixada da covid en Galicia pero os hospitalizados aínda están ao redor dos 150

As curvas das incidencias acumuladas, tanto a semanal como a bisemanal, seguen presentando unha clara tendencia de descenso desde o pequeno pico sufrido a mediados de outubro. Os  niveis de transmisión seguen sendo notables, pero nada que ver cos contagios masivos do principio do verán.

Con todo, hai que ter en conta que só contan os positivos a maiores e vulnerables, polo que a transmisión pode ser moito maior no conxunto da poboación. A tendencia á baixa que se aprecia no grupo ao que se lle fan probas pode estar influenciada pola dose de reforzo inxectada este outono, que limitou a cantidade de galegos que teñen síntomas e que necesita hospitalización por coronavirus.

A curva da derivada de casos activos confirma que estamos nunha fase de melloría, pois desde unha perspectiva semanal, cada día hai ao redor dun 2% de casos activos menos. 

Iso si, a covid-19 segue constituíndo un problema notable de saúde pública. Os datos globais para o conxunto de infeccións respiratorias agudas en España indican que case hai tantos positivos de gripe como de coronavirus. Ademais, a covid-19 provoca unha taxa de hospitalización que a gripe. A cifra de hospitalizados por covid en Galicia segue sendo relevanve, este outono está a moverse na contorna dos 150.

O Servizo Galego de Saúde (#Sergas) notifica este sábado tres falecidos con Covid-19 máis, así como un descenso dos casos activos até os 1.427 (-54), dos hospitalizados, até os 157 (-6), e dos contagios notificados nas últimas 24 horas, 85 (-20).
 

O tres óbitos notificados por Sanidade nas últimas horas aumenta o cómputo global até os en 3.975 falecidos desde que comezou a pandemia de Coronavirus. Por contra, curáronse un total de 681.796 galegos, resume Europa Press.

No que respecta aos casos activos, é dicir, persoas que actualmente atravesan a enfermidade, baixan en máis de medio centenar, até os 1.427, de acordo cos datos publicados este sábado, actualizados ás 18,00 horas do venres.

A baixada é practicamente xeneralizada, con tan só unha excepción: a área de Pontevedra, onde soben as infeccións activas até as 140 (+3).

Descenden, con todo, na área sanitaria da Coruña, a 285 (-4); en Ourense, a 268 (-6); en Santiago, a 175 (-5); en Vigo, a 282 (-19); en Lugo, a 151 (-15); e en Ferrol, a 125 (-9).

En canto aos hospitalizados covid, baixan en todos os distritos sanitarios menos na área de Santiago, onde aumentan até os 20 (+1); e na da Coruña, onde se incrementan até os 54 (+3).

Nas restantes, diminúen os ingresados na área de Ferrol, a sete (-2); en Pontevedra, a oito (-1); en Ourense, a 26 (-3); en Lugo, a 12 (-1); e en Vigo, a 30 (-3).

Por último, o Sergas detectou nas últimas 24 horas un total de 85 novos positivos en Covid-19, 20 menos que na xornada anterior. De todos eles, a área de Vigo concentra 17 casos; seguida pola da Coruña, con 16; Pontevedra, con 12; Ourense, Ferrol e Santiago, con 10 cada unha; e Lugo, con nove.