O exame da EBAU que pide o PP: un animal sen cabeza

O presidente do PP, Alberto Núñez Feijóo, anunciaba exultante a firma para unha EBAU igualitaria nas autonomías gobernadas polo seu partido. Incluso os presidentes con linguas propias nos seus territorios como Galicia ou Comunidade Valenciana, plasmaron a súa firma neste documento. En relación a isto, desde a Xunta de Galicia, Alfonso Rueda falaba de “ter en conta certas “peculiaridades” á hora de crear este exame común. En tal caso, 2025 será o ano en que se empezaría a establecer a proba “que é un fito no camiño da liberdade e a igualdade”, indicaba Feijóo. A parte disto, as fontes do partido non deixaban de sinalar que este acordo inclúe ao 70% do alumnado total do Estado, un feito que para o PP demostra por si só a importancia de unificar criterios nas probas de acceso á universidade. Con todo, a cuestión é saber se esta medida será eficaz, se se poderá aplicar o curso que vén (con toda a loxística que iso trae consigo) e se estas autonomías poderán aplicar o acordo sen saltar a lei educativa vixente, a LOMLOE.

MOTIVOS PARA ESTA LEI

O eixo ou eixos detrás desta “reforma” da EBAU son unha incógnita quitando as ideas “oficiais” esbozadas polo propio PP. Con todo, algúns dos sindicatos con representación no ámbito educativo han manifestado unha serie de puntos que poderían ser os motivos do movemento efectuado polo PP. Desde o Sector de Ensino de UXT-Servizos Públicos “na súa calidade de organización representativa de traballadores e traballadoras non se lle informou”.

“Cremos que detrás está ese 'acoso e derriba' contra o Goberno central e un desexo de homogeinización por parte do PP” di José Fuentes de CCOO. Desde esta forza sindical din non comprender moi ben este movemento “cando tal e como está feito a repartición do currículo escolar e das competencias educativas, o PP nunca puxo obxeccións”. Preguntado por un posible rumbo ideolóxico, Fontes responde que “o motivo é ideolóxico, o que piden non é posible dado a actual repartición de competencias”.

Suso Bermello, de CIG-Educación, sinala que estamos ante “un escaparate político no que inclúen a educación e todo para abrir outra fronte partidaria contra o goberno do Estado”. Bermello cualifica de farsa o proxecto do PP e observa ademais un “desexo de submisión preocupante por parte do presidente da Xunta e do conselleiro de Educación por prestar a este xogo”. E ademais, aínda que a “aplicación” da “selectividade” anunciada polo PP “en Galicia, a Comisión Interuniversitaria de Galicia (CIUGA) xa enviou documentación sobre como se farán as probas para o ano que vén.

UN ACORDO SEN SENTIDO

Así é como o ven desde as forzas sindicais consultadas. O currículo varía entre as CCAA entre un 40 e 50% segundo a actual lexislación educativa e ademais, o deseño das probas repártense entre o Ministerio, as CCAA e as Universidades. “O acordo fala de criterios de avaliación moi xerais e algúns de corrección moi concretos” sinalan de UXT. “A proba de ingreso á universidade debe ter coherencia co que o alumnado cursa nos dous cursos do Bacharelato e o enfoque competencial da LOMLOE”.

En tal caso, o PP obviou na súa proposta que o goberno e as CCAA teñen un instrumento moi valioso para forxar acordos en materia educativa que é a Conferencia Sectorial. “É aí onde ten sentido deseñar políticas educativas comúns”.

En esencia, ten percorrido esta proposta? “Non, e si levan adiante este documento será un erro moi grave” di José Fuentes. “O alumnado será examinado unicamente da porcentaxe da EBAU que é competencia do Estado, deixar de lado as materias competencia das CCAA non ten sentido e ademais invadiría competencias”. De facerse así “habería que realizar cambios lexislativos”.
 

“Está a darse unha contradición entre o que é a propaganda e a realidade. A realidade é que en Galicia as probas deséñaas a CIUGA que inclúe á administración educativa, profesorado de bacharelato e profesorado universitario”, di Suso Bermello. Por iso, ao final “para dar un cambio na EBAU habería que cambiar a LOMLOE, derrogar os currículos educativos e retirar as competencias en educación ás autonomías ademais de retirar as linguas cooficiais”. 

O percorrido da proposta en canto a unificación da EBAU é imposible. Así o ven forzas sindicais consultadas que visualizan unha falta de estudo en profundidade do ámbito educativo por parte do PP. Xunto a isto, establécense escenarios hipotéticos onde se deberían realizar cambios nas leis educativas (e xa van unhas cantas) para materializar a “unificación” que piden os 'populares'. Para esta reportaxe enviouse un cuestionario á Consellería de Educación e até o momento da redacción do mesmo non tívose resposta.