Eu acuso

“Os israelís coñecen como Guerra de independencia a de 1948. Para os palestinos é a 'Nakba', a «catástrofe» posto que o seu resultado foi un dos procesos de limpeza étnica máis amplos e dramáticos do noso tempo: preto dun millón de palestinos foro obrigados a emigrar a punta de fusil, abandonando as súas terras, os seus bens e os seus fogares: houbo matanzas de civís como as de Deir Yassin, e centos de poboados foron destruídos deliberadamente” (ILAN PAPPÉ: “A limpeza étnica de Palestina”)

Hoxe, case oito décadas despois estamos asistindo en Gaza a unha nova 'Nakba', un novo episodio de limpeza étnica cos mesmos actores. Por unha parte as vítimas: os palestinos, pola outra os verdugos: os israelís. Neste dramático e cruel escenario un non pode por máis que alzar a súa voz.

Eu acuso a Israel de estar provocando outra 'Nakba' contra os palestinos. Un novo crime contra a humanidade, unha nova inxustiza histórica. Eu acuso Israel de non querer a paz en Oriente Medio por non recoñecer os dereitos dos palestinos a ter un fogar na súa propia terra e obrigalos a vivir un éxodo permanente e eterno.

Eu acuso a Israel de seguir ocupando territorios, de construír novos asentamentos israelís en zonas ocupadas por palestinos. Unha política que consciente e deliberadamente busca impedir a solución de dous estados -Palestina e Israel- que conduzan a una paz duradeira na zona.
 

Eu acuso a Israel de estar violando continuamente un dereito internacional -as resolucións das Nacións Unidas, a IV Convención de Xenebra- que considera ilegal a súa política de ocupación de territorios palestinos así como un acto de xenocidio a súa actuación militar en Gaza.

Eu acuso a Israel de levar décadas sometendo ao pobo palestino a limitacións nos seus desprazamentos, a un difícil acceso as súas terras e recursos, a unha total falta de liberdade para finalmente, como estamos vendo agora en Gaza e antes en Palestina, obrigalos por vía militar a abandonar as súas terras,
 

Eu acuso a Israel de non respectar os dereitos dos prisioneiros palestinos que se amorean nas súas cadeas. Prisioneiros entre os que hai nenos e nenas que son sometidos a torturas e malos tratos. Actos que supoñen continuas violacións dos dereitos humanos e do dereito internacional.

Eu acuso á Comunidade internacional, con Estados Unidos á cabeza, de non usar a súa influencia para premer a Israel e que este deteña o actual xenocidio en Gaza, a política de construción de novos asentamentos en Cisxordania e Xerusalén Leste, e a que empece negociacións cos palestinos.

Eu acuso á Comunidade Internacional por non preocuparse como debera e non prestar máis atención ao que está actualmente pasando en Gaza, onde asistimos a un xenocidio que ten como vítimas principais a nenos e nenas palestinas para o que o exercito israelí esta utilizando armas compradas a Estados Unidos e á Unión Europea.

Eu acuso aos Estados Unidos de apoiar militar e economicamente a Israel sostendo así a súa política de exterminio do pobo palestino. Un apoio co que Estados Unidos busca protexer mellor os seus intereses en Oriente Medio que teñen moito que ver coas reservas petroleiras e de gas na zona.

Eu acuso aos Estados Unidos de que co seu apoio a Israel pon os intereses comerciais da súa industria armamentística por diante do dereito á vida dos palestinos.

Eu acuso aos Estados Unidos de pensar máis nos votos da comunidade xudía estadounidense, fortemente vinculada a Israel por lazos culturais e históricos, que nos dereitos históricos do pobo palestino e na paz en Oriente Medio.

Eu acuso á Unión Europea de non querer comprender as razóns sociais e políticas que favoreceron a aparición de Hamás e de que esta organización política se convertera na forza maioritaria nos territorios palestinos.

Eu acuso á Unión Europea de ter a súa cota de responsabilidade na crecente imposibilidade de que existan dous estados, Israel e Palestina, convivindo en paz e seguridade dando así unha resolución xusta e duradeira ao conflito palestino-israelí.
 

Eu acuso a Israel, Estados Unidos e á Unión Europea de seren, por activa ou por pasiva, culpables de que se estea producindo o maior infanticidio da historia da humanidade en Gaza e unha nova operación de limpeza étnica en Palestina.

Estas acusacións xorden froito de indignación ao ver o que está sucedendo en Gaza, e tamén en Cisxordania, e da conciencia sobre a responsabilidade que nesta nova 'Nabka' teñen as entidades políticas ás que acuso -Israel, Estados Unidos, a Unión Europea-. Responsabilidade por activa -no caso das dúas primeiras -Israel e os Estados Unidos- como directos causantes do xenocidio e a limpeza étnica e por pasiva -no caso da Unión Europea- por non utilizar toda a súa influencia para impedir, ou cando menos, denunciar tal magnicidio.
 

Son consciente de que estas acusacións miñas poden escandalizar, incluso molestar a non poucos cidadáns de boa vontade. Desculpas, mais eu non podo calar diante desta barbarie que, por outra parte, de novo nos intentan ocultar. Unha barbarie que está na orixe e no centro dos actuais problemas de Oriente Medio. Unha barbarie que atenta contra os meus principios.

E como son consciente asumo as miñas responsabilidades.
 

ILAN PAPPÉ: “A limpeza étnica de Palestina”.