Da nosa extra, non se coman nin un euro

As enfermeiras e fisioterapeutas que traballamos no Servizo Galego de Saúde volveremos comprobar, este mes de xuño, como os “comepagas” volven esnaquizar o noso recoñecemento retributivo.

Unha vez máis, e xa van 30, os profesionais que traballamos na sanidade pública non cobraremos a integridade da nosa paga extraordinaria, e, unha vez máis, perderemos ao redor de 350 euros. Ao ano, por tanto, uns 700 euros.

Un diñeiro que nos corresponde e que non poderemos utilizar para facer fronte a algúns dos gastos habituais de cada fogar e que son cada vez máis elevados. Xa perdemos a conta de canto subiu nos últimos anos a factura da luz ou do gas, o aluguer dunha vivenda ou o prezo do aceite ou calquera outro produto de primeira necesidade.

A explicación atopámola si remontámonos a 2010. Eran tempos de crises e o Goberno de José Luís Rodríguez Zapatero estableceu este recorte, do mesmo xeito que a redución dos nosos salarios, como unha medida extraordinaria e temporal. Pasaron os anos, e tamén os Gobernos, e a situación segue igual.

Mariano Rajoy non fixo nada e agora Pedro Sánchez tampouco. Nin el nin a súa vicepresidenta e ministra de Facenda, María Jesús Montero. Todos eles, ademais dos partidos políticos, permitiron que as sucesivas leis de Orzamentos Xerais do Estado non posibiliten volver cobrar a paga extra na súa totalidade.

Dá igual que a nosa economía leve anos crecendo, dá igual que lideremos, nestes momentos, o crecemento na zona euro, dá igual que si se destinen inxentes cantidades de recursos económicos a outras finalidades máis que cuestionables se o que buscamos é o interese xeral. 

Ademais estase vulnerando o Estatuto Marco do persoal estatutario dos servizos de saúde e o Estatuto Básico do Empregado Público (EBEP).

A eles dálles igual, pero a nós non. Desde SATSE vimos reclamando o noso dereito a recoñecer o noso traballo tal e como ten que ser, e non imos deixar de presionar a gobernos e partidos para que acaben con esta inxusta e discriminatoria realidade.

Agora, e baixo a lema “Da nosa extra, que non se coman nin un euro”, enfermeiras e fisioterapeutas ímonos a concentrar nos centros alzando a nosa voz para que os nosos responsables públicos reaccionen, dunha vez por todas, e cumpran coa lei e coa nosa profesión.

Á Xunta de Galicia e a Consellería de Sanidade pedímoslle que non sexan cómplices desta expropiación ilexítima, escudar en que non é da súa competencia, e que presione tamén ao Executivo central.

Non imos permitir que se queiran seguir facendo fotos connosco para vender nos medios de comunicación o boa que é a súa sanidade e os seus profesionais e que logo nos arrinconen e minusvaloren o noso traballo. 

Somos profesionais que, como o resto, queremos ver recoñecido o que facemos como corresponde, que non se coman nin un euro.