A Vermella de fútbol feminino gana o Mundial de futbol

Este domingo millóns de persoas de todos os sexos e idades aparcaron calquera tipo de actividade para estar atentas á televisión, radio e outros medios para gozar do partido da final no que a selección española de fútbol feminino facía historia gañando o Mundial de futbol á todopoderosa selección inglesa, a chamada a conseguir o prezado trofeo.

Un encontro no que se puido apreciar a gran evolución da selección española que mellorou o seu xogo de maneira extraordinaria, sen envexar á masculina. Un equipo compacto, cunha magnífica preparación física, un sistema de xogo rápido que había descolocado en moitas xogadas ao seu rival. Ocasións de aumentar o número de goles non lle faltaron, pero o final é o que importa, e a Vermella fíxose, nun tempo marca, co maior trofeo: ser campioas do mundo por méritos propios.

Para fortuna do fútbol feminino, con máis esforzo, sacrificio e menor soldo, conseguiron aumentar considerablemente o número de seguidores e afeccionados ao deporte do balompé - hainos que se fixeron agora-  porque xogan ao fútbol extraordinariamente, como así o destacaron os medios de comunicación internacionais. España  foi recoñecida como unha nova potencia mundial de fútbol feminino. O país vibrou como nunca co triunfo da Vermella. O 20 de agosto do 2023 será unha data para gardar na memoria  individual e colectiva de país en clave feminina, como se estaba esperando.

A final do Mundial, un fito sen precedentes no fútbol feminino español, nesta  ocasión si asistiu a Raíña Leticia acompaña da súa filla menor - moi afeccionada ao fútbol- , que estivo presente nesta celebración, da que gozou do triunfo da selección como mostraban as distintas imaxes e o seu entusiasmo. Rectificar din é unha boa actitude. Iso é o que fixo a Raíña quen até agora non estaba moito polo labor como se podo  comprobar o pasado ano ao non asistir á entrega do trofeo da Copa da Raíña. A súa primeira presenza na final da copa que leva o seu nome foi no 2019 e despois non lla viu máis. A Casa Real, contestando a unha pregunta de Catalunyapress sobre a ausencia da Raíña  na edición do 2022, dixo:, “Porque non pode asistir a todas as competicións que levan o seu nome ”. Seguro? Cando do que se trataba era de estar na final  porque a competición leva o seu nome e porque ela debería axudar ao fútbol feminino que xa estaba a cultivar triunfos e porque debe dar soporte a calquera outro deporte de mulleres, éntralle nas súas obrigacións. Por iso, hai que manifestar que a súa presenza foi valorada e achégaa aos mortais terreais, como debe ser.

O 20 de agosto, outra muller, con menos presenza nos medios de comunicación, María Pérez, facíase coa medalla de ouro do Mundial de Marcha. Un triunfo individual que deixa patente o papel das mulleres no deporte español, debuxando unha curva ascendente e levando ao deporte feminino ao podio dos vencedores. Por iso non quería deixar de falar de María Pérez, unha gran deportista con moitas horas de adestramento, esforzo e sacrificio que se recompensou con esa medalla de ouro.