A CUT denuncia a "letra pequena" nos centos de empregos "indignos" que oferta Stellantis Vigo
O sindicato critica as malas condicións laborais que ofrece a planta viguesa, a pesar de ser unha das máis rendibles e máis produtivas do grupo.
En Stellantis Vigo iniciaron esta semana un proceso para a contratación de preto de 300 novos traballadores. Estes centos de empregos están dispoñibles a traves das probas de selección de Adecco, que busca tanto a profesionais con e sen experiencia no sector para as liñas de produción da planta de Balaídos. A noticia, que a priori podería entender como un síntoma de crecemento na factoría olívica, enmarcase, segundo denuncia a Central Unitaria de Traballadoras (CUT), unha campaña que "non representa unha
creación de emprego real, senón a habitual rotación de persoal eventual".
SALARIOS BAIXOS, MALOS HORARIOS, ENFERMIDADES...
A CUT cifra nun 22% dun total de 6.300 traballadores a porcentaxe de contratos temporais na platilla de Stellantis Vigo. Isto son ao redor de 1.400 operarios, máis dunha quinta parte do persoal. "Na maioría
dos casos, estes postos deberían ser indefinidos ao tratar de roles estruturais para a produción", asumen desde a CUT, que leva anos denunciando o abuso dun mecanismo como son os contratos temporais co fin de "evitar a conversión de contratos temporais en indefinidos, obrigando a interromper relacións laborais para non incorrer en suposto fraude de lei".
Isto, sumado aos ERE que experimentou a planta nos últimos anos ou ás baixas por incapacidade e renuncias, provocou unha rotación practicamente constante na fábrica. "As condicións laborais ofrecidas por Stellantis Vigo fan que traballar na antiga Citroën deixe de ser sinónimo de estabilidade e condicións dignas, chegando a ser menos atractivo mesmo que a hostalaría con horarios e salarios máis estables", comparan desde a CUT, que tamén sinala que segue liderando aspectos como a rendibilidade e a produción -que non se traduciu en melloras laborais- a pesar da precariedade do persoal e as dificultades para atopar novo persoal.
Os salarios insuficientes con salarios, asegura o sindicato, "por baixo do SMI", as "presións" nun "clima laboral límite" onde se esixe manter un alto ritmo de traballo para manter a produción á alza, unha sobrecarga de traballo que causa "problemas de saúde física e mental" ou a imposibilidade para conciliar son algunhas das razóns que aduce a CUT para explicar as renuncias dos traballadores e parte da "letra pequena" que terán que asumir a cara novas deste proceso de selección.
"A dirección de Stellantis non pode sorprender de ter dificultades para atopar persoal cando promoveu unha degradación continua das condicións laborais, coa conivencia dos “sindicatos” SIT; UXT e CC.OO.", reprende a CUT. "Esiximos un cambio radical: condicións económicas xustas acorde co custo da vida actual, horarios estables e coñecidos con antelación, e melloras reais que garantan a conciliación, a estabilidade e unha contorna laboral saudable", demanda o sindicato, nun aviso á dirección sobre a que "recae a responsabilidade".
Escribe o teu comentario