A Xunta ordena retirar das redes o decálogo sobre recortes do IES de Melide, denuncia CIG

A inspección educativa ordenou ao IES de Melide retirar das súas redes sociais un decálogo elaborado polo claustro que detalla as consecuencias dos recortes de persoal deste curso e os previstos para o seguinte. O paradoxo é evidente: ese mesmo material segue impreso e colgado fisicamente nas paredes do centro, sen que a administración esixa a súa retirada. Así o denuncia unha nota da CIG-Ensino remitida esta tarde.

Non é a primeira vez. A CIG-Ensino denunciou episodios similares noutros institutos galegos, onde carteis e pancartas con mensaxes reivindicativas decoran corredores e fachadas sen que a inspección actúe. Tampouco o fixo en edificios do SERGAS ou da propia Xunta, repletos de mensaxes do persoal sanitario en defensa dos servizos públicos.

Recortes acumulados en Melide

O IES de Melide acumula este curso a perda dunha praza de inglés que obrigou a refacer os horarios xa comezado o curso, e a amortización de tres vacantes de Latín, Lingua Galega e Xeografía e Historia de face ao próximo ano, comprometendo proxectos como Erasmus+ ou a atención á diversidade.

A CIG-Ensino sinala directamente ao conselleiro Román Rodríguez e anuncia accións legais contra calquera intento de amedrentar ao profesorado. A Consellaría de Educación non respondeu por agora ás acusacións do sindicato. 

O episodio do IES de Melide está relacionado a polémica instrución de "neutralidade ideolóxica" que a Consellaría de Educación anunciou o pasado curso para rexer as actividades complementarias dos centros galegos. Román Rodríguez anunciou que remitiría unha instrución aos colexios para que velasen por esa neutralidade nas súas actividades, unha medida que docentes, sindicatos e familias interpretaron como unha sorte de censura encuberta. A CIG-Ensino, que xa entón denunciou a iniciativa, considera que o que persegue a Xunta é "un control e unha censura" .