Rueda viaxa a Turín para reunir con representantes de Stellantis pola factoría de Balaídos

O presidente da Xunta, Alfonso Rueda, reunirase este xoves co director de Operacións da Rexión Europa Estendida de Stellantis, Jean-Philippe Imparato, nun encontro que se celebrará na cidade italiana de Turín.

Así o anunciou o mandatario autonómico durante a súa intervención na presentación do novo Foro Empresarial do Porriño, levada a cabo nunha zona verde do Polígono da Granxa.

O presidente galego viaxará a Italia esta tarde acompañado da conselleira de Economía e Industria, María Jesús Lorenzana, para reunir cos directivos de Stellantis sobre as 12.00 horas deste xoves.
 

Segundo dixo, aos representantes da empresa trasladaralles que en Galicia existen "miles de postos de traballo" que fan as cousas "moi ben", ademais da cantidade de fondos públicos que se están dedicando para manter o sistema da automoción na Comunidade. "Hai que dicir o que hai", reivindicou.