Gran protesta en Pontevedra o 24 de maio en Pontevedra en contra de Altri e Ence Lourizán

A Asociación Pola Defensa dá Ría (#APDR) e o colectivo Ulloa Viva anunciaron que a tradicional camiñada anual até as instalacións de Ence en Lourizán cambia este ano de formato. O próximo 24 de maio, unha manifestación percorrerá o centro de Pontevedra partindo da Alameda ás 12.30 horas para regresar ao mesmo punto unha hora despois, onde concluirá cunha "mani-festa" que mestura protesta e celebración cidadá.

O presidente da APDR, Antón Masa, explicou que a asemblea da entidade apoiou o cambio. A novidade máis destacada é que a convocatoria incorpora este ano de forma explícita o rexeitamento ao proxecto de macrocelulosa da multinacional portuguesa Altri en Palas de Rei (Lugo), xunto á histórica esixencia de peche de Ence. Ambos os colectivos sosteñen que os dous proxectos representan o mesmo modelo expansivo que ameaza os ríos e rías galegas e favorece as plantacións de eucalipto.

A elección do centro urbano non é casual: nas inmediacións da delegación territorial da Xunta atópase a sede de Altri en Pontevedra. Alí os manifestantes depositarán unha coroa de eucalipto coas siglas "RIP" para esixir o abandono definitivo do proxecto. Unha acción simbólica que cobra relevancia despois de que a Xunta iniciase o arquivo do expediente de Altri en febreiro de 2026, tras quedar excluída a subestación eléctrica necesaria da planificación estatal até 2030. 

A PANTASMA DE ALTRI

Con todo, Ulloa Viva advirte de que o perigo non está conxurado. O colectivo lembra que a propia Xunta presentou alegacións para incluír esa infraestrutura na planificación enerxética do Estado, o que interpreta como un sinal de que o Goberno galego non renunciou a apoiar a planta. Por iso, manteñen activa unha campaña de recollida de firmas dirixida ao presidente Alfonso Rueda, reclamándolle un rexeitamento explícito e definitivo. 

Desde Ulloa Viva recoñecen que, aínda que celebran a freada ao proxecto, non poden deixar de expresar a súa "rabia" porque a Consellería circunscribise o arquivo exclusivamente á falta da subestación eléctrica, e non aos seus impactos sobre a poboación e o medioambiente. A Xunta non se pronunciou sobre as acusacións dos colectivos.

A APDR, pola súa banda, mantén outra fronte aberta contra Ence. A asociación confía en que a futura reforma do regulamento da Lei de Costas teña consecuencias directas sobre a concesión da pasteira en Lourizán. Apuntan que a modificación normativa responde a esixencias da Unión Europea e que foron eles mesmos quen alertaron da situación ante Bruxelas hai anos.

O LÍMITE DE 2033

O novo regulamento establecería un tope de 75 anos para as concesións no dominio público marítimo-terrestre, sumando o prazo inicial e todas as súas prórrogas. O criterio fixa de modo inequívoco que ese prazo máximo inclúe tanto o período inicial como todas as posibles prórrogas. Baixo esa lectura, Ence non podería operar na ría até 2073, como defende a empresa, senón unicamente até 2033. 

O texto tamén permitiría revogar concesións en instalacións con risco de inundación, unha circunstancia que, segundo a APDR, afecto recurrentemente á fábrica de Lourizán. Ence non respondeu a estas valoracións ao peche desta información.