Repartición por días do Caudal Fest: Amaral e Viva Suecia o venres; Mikel Izal, Arde Bogotá e Xenebras o sábado

O Caudal Fest, que se celebrará en Lugo o 20 e 21 de setembro, presentou o seu cartel por días e iniciará a venda de entradas de día o vindeiro xoves ás 12,00 horas. 

Así o anunciou este xoves a alcaldesa de Lugo, Paula Alvarellos, que, ademais, detallou que os novos artistas que se suman á cita son Parkineos, Ana Lua Caiano, Querido e Dani Dicostas. 

Desa forma, o venres 20 de setembro os protagonistas serán Amaral, Viva Suecia, Carlos Sadness, Varry Brava, Huecco, Karavana, Xina Moura e Ramón Mirabet. Ademais, o festival engadiu a nivel artístico á portuguesa Ana Lua Caiano e ao galego Querido.
 

O sábado 21 subiranse ao escenario artistas como Mikel Izal, Arde Bogotá, Xenebras, Nil Moliner, Ladilla Rusa, A túa Outra Bonita, Siloé e Monoulious DOP. A eles súmanse Parkineos e Dani Dicostas.

Alvarellos lembrou que desde que no Concello apostaron por inciar esta cita musical en 2018, o Caudal "non deixou de crecer", tanto en volume de asistentes, infraestruturas, como na calidade do seu cartel.

Ao longo das próximas semanas desvelarán novidades desta edición que buscará "ser a máis exitosa" do historial do festival até o momento e as entradas de día sairán á venda, na páxina web do festival, o vindeiro xoves ás 12,00 horas.

"En 2023, o evento reuniu a 37.567 persoas en Lugo, supondo un retorno económico de 7,3 millóns de euros para o municipio e xerando máis de 350 emprego directos e 2.000 indirectos", subliñou a alcaldesa.