O programa de medicamentos non demorables xa conta con case 4.000 pacientes

Un total de 3.998 pacientes xa se acolleron ao programa de prescrición de medicamentos non demorables que a Xunta de Galicia puxo en marcha en febreiro en colaboración cos colexios oficiais de farmacéuticos.

Segundo recolle o Goberno galego, durante os seus primeiros 10 meses de funcionamento, a rede sanitaria pública concertou unha media de 19,1 citas diarias para a renovación de medicación sen demora e que se necesita para o tratamento de certas doenzas crónicas.

Así, a distribución das citas vinculadas a este programa sitúa á cidade de Vigo como a localidade con maior adherencia, con 545 citas; seguida pola Coruña, con 340; e Santiago de Compostela, con 211. Máis aló do sete grandes cidades galegas, o concello de Narón (92 citas), Redondela (90) e Baiona (74) son os municipios que contan cunha maior participación no programa.

A medida adoptada ten como fin, tal e como lembra a Xunta, diminuír o número de consultas forzadas ou sen cita nos centros de atención primaria, evitar o bloqueo das axendas médicas, reducir os desprazamentos innecesarios dos usuarios e minorar a interrupción de tratamentos e os seus posibles problemas para a saúde dos enfermos.

As medicacións retiradas con maior asiduidade nestes primeiros 10 meses de funcionamento son os tratamentos de insulina, os fármacos para tratar a hipertensión, os antiacoagulantes e determinadas terapias inmunosupresoras e de carácter neuropsiquiátrico.