​Rajoy avisa a Puigdemont de que non cambiarán "as regras do xogo" para que regrese

"Cando non se respecta a lei, hai consencuencias". Foto: @marianorajoy

O presidente do Goberno reiterou este mércores que "fará todo o posible" para que se cumpra a lei en España, de forma que Carles Puigdemont non sexa investido presidente da Generalitat. Neste punto, confirmou que están preparados para recorrer ante o Tribunal Constitucional en canto se produza unha decisión da Mesa do Parlamento catalán porque teñen que "respectar sempre os procedementos e as formas".

Nunha entrevista en Onda Cero, Rajoy confirmou que xa recibiu a carta do presidente do Parlamento catalán, Roger Torrent, pero non quixo adiantar que lle dirá na súa misiva de resposta. Iso si, subliñou que non pode pretender que o Goberno tome algunha decisión que "non pode tomar" como "todo o referido ás decisións xudiciais.

Ante a petición de Puigdemont de poder regresar a Cataluña "sen risco" a ser detido, o presidente do Goberno sinalou que é "bo que todo o mundo asuma as súas responsabilidades". "Xa sabe cales son as regras de xogo. España é unha democracia e cando non se respecta a lei, hai consecuencias", avisou, para engadir que se o ex presidente catalán regresa a España "será detido".

SEN PLAN B PARA OS ORZAMENTOS

Rajoy tamén asegurou que non ten un 'plan B' por se fracasa a negociación dos Orzamentos Xerais do Estado para 2018 porque está convencido de que sairán adiante e acabarán aprobándose.

"Non estamos a facer un 'plan B', estamos en conversacións para tentar aprobar os Orzamentos e cando finalicen, xa o contaremos", dixo o presidente, que precisou que o peor que podería facer para que saíse mal a negociación é "ir radiándoa ou televisándoa".

Rajoy lembrou, así mesmo, que o ano pasado os Orzamentos aprobáronse o 31 de marzo e a economía evolucionou favorablemente.

PENSA REPETIR COMO CANDIDATO

O presidente do Goberno reiterou, ademais, que "a data de hoxe", a súa vontade é repetir como candidato do PP nas próximas eleccións xerais e engadiu que o tentará porque, ao seu xuízo, cre que se camiña na "boa dirección".

Rajoy condiciona esta decisión para ver "como se vaian producindo os acontecementos", sen concretar as súas razóns, pero insistiu en que o tentará, nun momento en que algúns cargos do PP puxeron en privado sobre a mesa ese debate sobre a renovación no PP tras o revés electoral do partido nas pasadas eleccións catalás.