O Aquae Talent Hub repite experiencia en Santiago como catalizador de ideas innovadoras

A xornada serviu para 'cambiar o chip' aos asistentes. Fotos: Viaqua

Mellorar a vida das persoas, da nosa contorna máis próxima, pero tamén daqueles que viven lonxe de nós. Sobre esas ideas e a súa estreita relación coa innovación e a sustentabilidade ambiental, o segundo encontro Aquae Talent Hub celebrado en Santiago espertou as mentes das case 400 persoas que participaron na xornada.

A Facultade de Económicas da Universidade de Santiago de Compostela volveuse encher este mércores de emprendedores, profesionais e estudantes para non perder a master class do escritor e xornalista Santiago Roncagliolo nin o taller práctico conducido pola investigadora Irene Lapuente. O evento, ao que acudiron máis de 2.800 persoas en distintas cidades, está impulsado por Fundación Aquae, Viaqua e a USC.

A AUGA CONDICIONA A VIDA E A SAÚDE

Santiago Roncagliolo contou a súa experiencia persoal na Amazonía peruana, onde viaxou en 2015, da man de UNICEF e Fundación Aquae, para coñecer de preto como é vivir sen auga segura e sen saneamento.

O escritor, xornalista e guionista peruano explicou o enorme reto que supón levar auga e sistemas de saneamento a esta poboación indíxena, un cruel paradoxo xa que neste territorio a auga é a protagonista da vida: "O río é a tenda, a neveira, a autoestrada e un foco de enfermidades".

Este experto en innovación solidaria seduciu o público do Aquae Talent Hub coas súas reflexións sobre o contraste de civilizacións, chamando a atención sobre as carencias dos servizos máis básicos que sofre a comunidade indíxena e os problemas que isto representa para a súa calidade e esperanza de vida.

"SOLUCIÓNS INNOVADORAS" DESDE A EMPATÍA

Pola súa banda, Irene Lapuente, foi a encargada de transmitir no evento experiencias de creatividade e de motivación desde a perspectiva do desing thinking, a empatía, a identificación e a ideación.

Lapuente destacou a importancia de traballar en equipo. "Para a innovación solidaria é necesaria a empatía, porque esta mira as persoas e a contorna", explicou. Ademais, convidou o público a "deixar de ser solucionadores para saber identificar o marco dos problemas, o que conducirá a verdadeiras solucións innovadoras".