Santiago Roncagliolo: "É posible salvar vidas coidando o medio ambiente e cun custo mínimo"
O escritor e xornalista Santiago Roncagliolo descubrirá nesta edición do Aquae Talent Hub os heroes anónimos da innovación solidaria.
Santiago Roncagliolo, nunha edición anterior. Foto: Viaqua
A Facultade de Económicas da Universidade de Santiago acolle este mércores a VI edición de Aquae Talent Hub, a segunda que se celebra na capital galega, "un encontro para mentes inquietas e curiosas que queren aprender sobre innovación, compartir coñecementos e ampliar a súa rede de contactos", como sinala a organización nun comunicado.
Este evento, que é de acceso gratuíto, aínda que require unha reserva na súa web, xa que o aforamento é limitado, contará co xornalista e escritor Santiago Roncagliolo, responsable da master class, e a experta en design thinking Irene Lapuente, condutora do taller.
O obxectivo que persegue Fundación Aquae, promotora da iniciativa xunto con Viaqua e a USC, é "xerar o interese polo emprendemento e os proxectos dos emprendedores, así como achegar visibilidade a iniciativas sociais que teñan unha vinculación co medio ambiente, a cultura, a cooperación e o emprendemento social".
"LEVAR VIDA"
Santiago Roncagliolo centrará o seu relatorio na innovación solidaria, no proxecto 'Amazonas: levar auga é levar vida", unha iniciativa de Unicef impulsada por Fundación Aquae que está a permitir ás comunidades indíxenas da Amazonía peruana acceder á auga e a sistemas de saneamento. Un proxecto que chegou xa a unhas 5.000 familias.
"Esta zona do Amazonas está chea de auga, pero a xente morre por falta dela. É posible salvar as súas vidas coidando o medio ambiente e cun custo mínimo", sinala Roncagliolo, que contará as historias dos pequenos heroes que o están facendo posible.
Pola súa banda, o taller de Aquae Talent Hub permitirá explorar o proceso creativo e como xerar novas ideas dunha forma diferente. Estará liderado por Irene Lapuente, experta en Comunicación e Pedagoxía (as súas áreas de expertise son o método científico, o designthinking e os procesos creativos).
Escribe o teu comentario