A accesibilidade "é un dereito que se está pisando"

Concentración en Santiago. Foto: COGAMI

Máis de medio centeno de persoas, segundo os convocantes, concentrouse ante o Obelisco, na Coruña, para reclamar o dereito a unha "accesibilidade universal", nunha mobilización convocada polo Grupo de Persoas con Discapacidade da Coruña (Grumico) e a Liga Reumatolóxica Galega.

A concentración formou parte dunha campaña convocada a nivel nacional, baixo o hashtag '#AccesibilidadYA' con concentracións en cidades españolas, entre elas máis de 30 concellos galegos.

En declaracións a Europa Press, a vicepresidenta de Grumico, Rosalía López, -encargada da lectura dun manifesto- lembrou que o 4 de decembro acaba o prazo para que todos os servizos, entre eles os aparcadoiros públicos, sexan accesibles.

"UN DEREITO"

Con todo, sinalou que na práctica non se están adoptando as medidas necesarias para que nesta data se cumpra este obxectivo. "É un dereito que se está pisando", remarcou denunciando "o incumprimento" por parte das administracións públicas pero tamén en comunidades de veciños.

No caso das cidades galegas, sinalou que algunhas, coma Lugo, "están máis avanzadas". Con todo, dixo que na Coruña houbo unha "parálise" a este respecto.

COGAMI EN SANTIAGO

Na capital galega, máis dun cento de persoas concentráronse convocadas por COGAMI pedindo "espazos para todos" e a eliminación de barreiras, como parte desta campaña.

A asociación fixo público un manifesto coas súas reivindicacións.