Feijóo acepta unha comisión para alcanzar "un acordo de país" sobre política forestal

O presidente da Xunta aceptou, como viña reclamando a oposición durante as últimas semanas, a creación dunha comisión específica no Parlamento galego na que alcanzar "un acordo de país" sobre política forestal e loita contra o lume que "blinde" a "unidade" de criterio e acción.

Na súa intervención na Cámara para abordar a última vaga de lumes de Galicia, Feijóo deu conta dun paquete de 30 medidas centradas nos ámbitos de prevención, ordenación forestal e persecución de incendiarios.

Respecto diso, Xoaquín Fernández Leiceaga e Luís Villares valoraron a posta en marcha desta comisión, aínda que este último pediu que se amplíe de forma "ambiciosa" a un "pacto nacional polo territorio".

Pola súa banda, Ana Pontón reclamou que sexa unha comisión que sirva para saber "que pasou" na vaga de lumes, ademais de abordar medidas para o futuro, aínda que manifestou a súa "vontade de colaborar".

PERSEGUIR A INCENDIARIOS

"Imos a por eles e pagarán polo que fixeron", espetou Núñez Feijóo sobre os incendiarios na súa toma da palabra.

Con este fin, expuxo varias iniciativas para facilitar a tarefa de identificar incendiarios. Deste xeito, crearanse equipos forestais de investigación, que ampliarán o traballo das Forzas e Corpos de Seguridade do Estado. Haberá 57 axentes deste tipo -tres por cada un dos 19 axentes forestais--.

Así mesmo, avanzou a creación de "equipos de vixilancia de incumprimento" das distancias de seguridade e localizar parcelas abandonadas.

Xunto a isto, instalarase unha rede de videovixilancia de forma proporcional aos lumes que sofre cada zona en localizacións que ten o operador público Retegal. Quérese que o 085 sexa tamén un teléfono para alertar de incendiarios ademais de avistamento de lumes. "Galicia non sufrirá o mesmo sen incendiarios", asegurou.

MEDIDAS FORESTAIS

No ámbito forestal, aposta por incentivar economicamente a limpeza de montes, especialmente a de franxas secundarias próximas a núcleos de poboación. Así, os propietarios que deleguen nos municipios estes traballos pagarán un prezo fixo -equiparable a unha roza básica- e as administracións cubrirán a parte restante necesaria.

Os terreos abandonados con dono sen identificar pasarán ao banco de terras de forma cautelar nada máis comezar a indagar sobre se o seu propietario está falecido, ilocalizable ou é descoñecido.

En Galicia hai 300.000 parcelas con titular descoñecido e son aínda máis as que correspondes a persoas mortas ou que non se poden localizar, explicou Feijóo.

Tamén irán ao banco de terras as leiras en montes veciñais das que os comuneiros non queiran facerse cargo. Abre a porta ao impulso de polígonos agrarios coa mobilización de terras cando exista demanda empresarial para a súa rendibilidade.

Outras actuacións son: promover o pastoreo extensivo en Ourense e Pontevedra con creación de infraestruturas como almacéns de forraxe; avanzar na reestruturación parcelaria (coa apertura dunha plataforma tecnolóxica con información xeolocalizada); e realizar incentivos a emprendedores do forestal a través das Sofor cunha normativa máis flexible.

"TERRORISMO INCENDIARIO"

O presidente da Xunta situou de novo ao "terrorismo incendiario" como responsable da vaga de incendios. En fronte, a oposición reprochoulle que se "agoche" tras "unha cortina de fume" e esixiulle depurar responsabilidades con cesamentos no seu Goberno, para ser "crible" e poder despois acordar as bases dun cambio na política forestal autonómica.

"As primeiras análises apuntan á mesma tendencia nos 264 lumes que xurdiron en Galicia" na onda de outubro, esgrimiu, para sinalar que son os policías os que deben dicir "se houbo ou non unha trama", pero convencido de que, quen prendeu lume "sabe que pode xerar terror".

"Non imos perdoar a quen puxo en risco a Galicia, que está farta dos incendios e dos incendiarios". "Imos a por eles e pagarán polo que fixeron", sentenciou.

RECLAMO DE CESAMENTOS

A tese do "terrorismo incendiario" de Feijóo topou de fronte co rexeitamento do portavoz de En Marea, Luís Villares; PSdeG, Xoaquín Fernández Leiceaga; e BNG, Ana Pontón. A dirixente nacionalista afeou a Feijóo que use "os medios públicos" para construír "un relato autoexculpatorio" e, recoñeceu que a Galicia "quéimana os incendiarios", pero tamén "as políticas pirómanas da Xunta e as portas xiratorias de Ence".

Como posteriormente fixo Villares, a nacionalista comparou o ocorrido coa catástrofe do 'Prestige'. "Os alcaldes puxéronse á fronte cunha Xunta ausente e miles de persoas tiveron que coller os capachos do 'Prestige', esta vez para frear o chapapote dos incendios", sentenciou, antes de aconsellar ao presidente seguir "o consello" que el mesmo deu durante a vaga de incendios de 2006 e cesar á conselleira de Medio Rural, Ángeles Vázquez.

Tamén Leiceaga pediu cesar á conselleira e ao responsable de política forestal da Xunta, Tomás Fernández-Couto. O socialista ironizou, ademais, con que "non hai trama máis improbable" que a que poidan constituír o autor dunha queima "imprudente" por "facer unha grellada e unha señora de 70 anos". "De terrorismo incendiario, nada", descartou.

A continuación e, na liña dos seus compañeiros da oposición, ademais de afear a "ausencia de autocrítica", Leiceaga botou en cara a Feijóo o "fracaso" da súa política forestal e tamén a descoordinación do dispositivo.

"Mentres os veciños pensaban en como salvar a súa casa, Núñez pensaba en como salvar a súa cara. A noite do domingo negro o único que se rendeu foi o presidente, cando o lume queimou a súa fachada de cartón pedra de bo xestor", dixo Villares, mentres que Ana Pontón suxeriu que se mobilizaron helicópteros só para que estivesen nunha visita de Ángeles Vázquez a Cervantes e preguntouse se hai "malversación". Posteriormente, Feijóo tachou de "falacia" esta acusación.

"NON É IGUAL QUE EN 2006"

O portavoz popular na Cámara, Pedro Puy, ha replicado que a "única" en falar de "tramas" é a oposición e, tras defender a acción da Xunta, advertiu que "non son as políticas as que queiman os montes, senón os incendiarios".