Lara Méndez: "Mañá haberá que pedir explicacións"

A alcaldesa de Lugo, Lara Méndez, e o portavoz socialista do goberno da Deputación, Álvaro Santos, coincidiron este luns en sinalar que, que "aínda que hoxe non é o día", pedirán á Xunta "explicacións" sobre a onda de incendios que afecta a Galicia.

Ambos os políticos realizaron estas declaracións tras gardar un minuto de silencio ás portas do consistorio, ao fío do mediodía, para mostrar a súa solidariedade en relación aos incendios e o dó polo falecemento de catro persoas.

"Hoxe é un día triste para Galicia. Vivimos nunha situación de alerta máxima e o que toca agora é traballar para extinguir todos os incendios e que esta situación non prevaleza no tempo", sinalou a alcaldesa.

En relación ao concello, Lara Méndez concretou que "a situación está controlada". "Esta madrugada, á unha, cando saía do parque de bombeiros, quedaba a situación controlada, houbo un repunte ás cinco da mañá, pero cun control total. Neste momento, a situación está controlada", asegurou.

Con todo, deixou claro que "hoxe toca traballar para liquidar a situación e mañá haberá que pedir explicacións, porque evidentemente hai que dalas e haberá que esixilas".

DEPUTACIÓN

Pola súa banda, o portavoz do goberno provincial da Deputación, Álvaro Santos, subliñou que "hoxe toca apagar o lume, pero unha vez que estean apagados os incendios toca sentar". "Galicia non está preparada para afrontar unha catástrofe destas dimensións", resumiu.

No Concello de Friol, onde Santos é concelleiro do PSOE, destacou "a mobilización dos veciños". "Hai que estar agradecidos e aprender moito deles", indicou.

Na provincia, apuntou, "hai máis de vinte focos", fronte aos que "a deputación está a colaborar". "Unha vez que se apaguen os lumes, haberá que sentar, non haberá un político que non entenda a catástrofe dos incendios como un problema de país. Galicia tivo que ordenar o urbanismo, se non ordenamos o territorio acabaremos coa vida da xente", finalizou.