"Está a man do home detrás e Galicia sábeo"

O delegado do Goberno en Galicia, Santiago Villanueva, resaltou que "todos os indicios" apuntan a que os múltiples incendios que afectan a Galicia son "provocados" e sinalou que entre as seis da tarde do domingo e a medianoite iniciáronse máis de 60 lumes.

Nunha entrevista na Cadena Ser, Villanueva agregou que durante a fin de semana rexistráronse en Galicia 200 incendios no que constitúe "unha actividade impensable, evidentemente provocada". "Algúns cualifícano como terrorismo incendiario, é un dos cualificativos que se lle poden aplicar", dixo.

Así mesmo, a conselleira de Medio Rural precisou que todos os incendios foron "intencionados": "son atentados", dixo, remachando: "Sucedeu porque está a man do home detrás. Galicia sábeo"

Así mesmo, Villanueva confirmou que hai "varios investigados" por parte da Policía e da Garda Civil. "Nalgún caso tomóuselles declaración e noutros casos hai investigados", afirmou e engadiu que algúns están "no punto de mira da Garda Civil ou a Policía Nacional e noutros casos si se lles tomou declaración".

Segundo fontes policiais, algunhas das persoas identificadas foron trasladadas a dependencias policiais para realizar comprobacións aínda que, polo momento, non se levaron a cabo detencións.

4.500 EFECTIVOS

O delegado do Goberno en Galicia relatou unha situación "moi complicada" na que "o principal aliado, máis que a choiva, é que pare o vento", porque nalgunhas zonas está a soprar a máis de 100 quilómetros por hora, o que provoca que "o lume se estenda practicamente como un regueiro de pólvora".

Así, relatou como se viviron situacións "inauditas", como que un incendio procedente de Portugal saltase o río Miño e se propagase por Galicia. En calquera caso, afirmou que están mobilizados "moitísimos efectivos", que cifrou en máis de 4.500 persoas.