PSOE e En Marea chegan a un acordo de mínimos sobre a comisión do accidente do Alvia

Alexandra Fernández anunciou o pacto. Foto: @aKonllontai

O PSOE e En Marea chegaron a un acordo de mínimos para a fusión das súas propostas de creación dunha comisión de investigación sobre as causas do accidente ferroviario de Angrois.

A orde do día do Pleno do Congreso deste xoves incluía o debate sobre a creación da citada comisión e a votación de dúas propostas: unha presentada polo PSOE e outra rexistrada polo grupo confederal de Unidos Podemos e o Mixto.

Con todo, nas últimas horas, PSOE e Unidos Podemos e o Mixto transaccionaron as súas iniciativas tendo en conta que o obxectivo de ambas as partes é o que veñen reclamando as vítimas do sinistro desde o primeiro momento, é dicir, "que se faga xustiza", segundo explicou en rolda de prensa a deputada de En Marea Alexandra Fernández.

OS SEUS OBXECTIVOS, MÁIS AMBICIOSOS

Por tanto, e salvo un veto de última hora, o Pleno votará unha soa proposta que, segundo Fernández, supón un acordo de mínimos para poñer en marcha a comisión. Posteriormente, segundo recalcou, En Marea velará por que o plan de traballo que elabore a comisión contemple os seus obxectivos, que son "moito máis amplos" que os expostos polo PSOE.

Segundo lembrou, En Marea sempre loitou por chegar "á raíz do problema" e por que se busquen solucións para que accidentes destas características non se repitan. Pero, ademais, apuntou que pretenden que se oia a voz da Plataforma de Vítimas Alvia 04155.

"Isto non pode quedar nunha cuestión de partidos --dixo--, e traer as vítimas sería un gran indicador de saúde democrática e demostraría a vontade real dos diferentes grupos de que hai compromiso coa verdade e a reparación" para con elas.