Noriega critica que o PP usa a Xunta para a súa "precampaña eterna"

Noriega di que non o pensan só desde Santiago.

O alcalde de Santiago, Martiño Noriega, criticou ao PPdeG por "confundir interesadamente a institución co partido" e empregar o Goberno galego para "acompañar a precampaña eterna" dos populares para as eleccións municipais previstas para o ano 2019.

Este martes, tras un ano da vitoria do PPdeG nas eleccións autonómicas de 2016 nas que Alberto Núñez Feijóo conseguiu a súa terceira maioría absoluta consecutiva, Noriega fixo balance a preguntas dos medios das relacións entre a Xunta e o Concello de Santiago no que vai de lexislatura.

"Despois dun período inicial de desarmamento poselectoral, dá a sensación de que o sesgo partidario volve ser maioritario na maneira que ten a Xunta de relacionarse cos concellos", comentou.

Así, cre que o partido que lidera Núñez Feijóo emprega "as declaracións" e "actos" do Goberno galego para "acompañar a precampaña eterna" na que, di, viven os populares galegos para as próximas eleccións municipais.

Neste sentido, tras remarcar que o "balance" realizado este martes corresponde ao seu perfil "institucional" como alcalde da capital galega e non como "representante político", Martiño Noriega opinou que o PP "segue confundindo interesadamente a institución co partido".

A continuación, asegurou que esa sensación non se percibe exclusivamente en Santiago, senón que se estende a "moitos concellos" nos que o PP non goberna. "O feito de que o PP só goberne en Ourense nas grandes cidades acentúa esa posición e non é unha novidade", apostilou.