O referendo catalán queda sen webs nin carteis de propaganda

Imprenta dos carteis do referendo.

A Garda Civil interveu nunha empresa de Sant Adriá de Besós (Barcelona) as pranchas utilizadas para confeccionar a propaganda institucional destinada a publicitar o referendo, informou o Ministerio de Interior.

Nesta empresa, chamada Zukoy, incautouse tanto as pranchas destinadas á elaboración dos carteis institucionais de apoio ao referendo do 1 de outubro como a prancha destinada a a publicitar o SI no referendo, suspendido polo Tribunal Constitucional. "Desta maneira imposibilítase que se siga imprimindo este tipo de carteis", subliña Interior.

Interior considera "significativo" que se incautaron na mesma empresa e na mesma localización os dous tipos de pranchas. "Este feito demostra que os carteis, tanto de difusión do referendo como de apoio ao Voto SI, elaboráronse no mesmo lugar e no mesmo tempo", indica.

A operación continúa aberta e o Ministerio non descarta novas actuacións.

BLOQUEO DOS DOMINIOS

O xulgado de instrución número 13 de Barcelona remitiu ás operadoras de telecomunicacións que bloqueen o acceso a varias webs relacionadas co referendo do 1-O no prazo de 24 horas.

En concreto, solicita de forma moi urxente que impidan o acceso aos dominios ref1oct.cat, ref1oct.eu, referendum.es, referendum.cat, referendumoctubre1.com, referendum.ws, referendumoctubre1.cat, referendumoct1.cat, 1octreferendum.cat e garanties.cat, segundo figura na orde remitida.

A Garda Civil xa clausurou este mércores a páxina web referendum.cat por orde do Xulgado número 13 de Barcelona.

Pola súa banda, as webs que agora solicitou o xuíz impedir o seu acceso tamén se atopan inoperativas este sábado e mesmo o acceso a algunhas delas está pechada desde o venres pola noite.