Rajoy reclama desde Santiago "sentidiño" aos independentistas e que rectifiquen

Rajoy reclama "sentidiño".

O presidente do Goberno insistiu este sábado en Santiago de Compostela que o referendo do 1 de outubro convocado pola Generalitat de Cataluña "non se vai celebrar" porque, ao seu xuízo, supoñería "a liquidación da vontade da maioría dos españois".

Rajoy remarcou que se está ante un "momento importante" para que "algúns reflexionen e volvan á racionalidade, ao sentido común e á legalidade". O presidente insistiu en que "ningún goberno pode, de ningunha maneira, aceptar o que está a ocorrer nestes momentos en Cataluña".

CUMPRIR A LEI

Preguntado directamente pola recepción no Palau da Generalitat a centenares de alcaldes investigados por asinar decretos de compromiso co 1-O, limitouse a contestar que aos rexedores "pídeselles só que cumpran a lei e que non colaboren na celebración dun referendo ilegal". "É algo moi razoable", apostilou respecto diso.

Nesta mesma liña, referiuse á alcaldesa de Barcelona, Ada Colau: "Vin que estaba nesa reunión (en alusión á recepción no Palau da Generalitat). A señora Colau dixo que ela non vai ceder locais para a celebración do referendo. Por iso, nada que dicirlle: mentres non os ceda non temos nada que apuntar", razoou o titular do Goberno.

SENTIDIÑO

Rajoy afirmou que os cidadáns contrarios ao desafío independentista poden ter "a total e absoluta certeza" de que as cousas "volverán pronto ao rego". É máis, gustaríalle que fose por "un acto voluntario de quen está dando este espectáculo".

Pero ademais, no seu discurso durante a homenaxe de Albor, o presidente do Goberno apelou ao "sentidiño", xa que sostén que "sería positivo exportalo", en clara alusión á situación catalá: "Cando un se pon en contra da legalidade e a racionalidade ten que pensar, sobre todo se o fai á brava, que nada bo pode producir coa súa situación".

En cambio, proseguiu, "se un é capaz de rectificar, todo o bo se pode producir para el e para os demais". "Creo que iso é o sentidiño", resolveu.

REFORMA ESTÉRIL DA CONSTITUCIÓN

Pola súa banda, Núñez Feijó, asegurou que "reformar a Constitución cos que non queren ningunha constitución española é un camiño estéril", en referencia ao desafío soberanista de Cataluña que, na súa opinión, supón un "golpe de estado" a través de "unha concatenación de acontecementos" prolongados no tempo.

A continuación, convidou a "non caer na trampa grotesca de comparar o Estado das Autonomías cun federalismo platónico" e asegurou que "a nova política reivindica unha vella política de vencedores e perdedores" na que "non hai novos valores" senón "vellos desquites".