Condenada unha empresa que quixo coar no comité a un sindicato afín

Cofares Noroeste e do Cantábrico, --empresa dedicada á distribución e venda de produtos vinculados co ámbito farmacéutico e sanitario-- foi condenada a readmitir a un traballador "por vulneración dos seus dereitos fundamentais", segundo informa a CIG.

Nun comunicado, a central sindical sostén que o despedimento se produciu "en represalia por tomar unha decisión como vogal da mesa electoral que, nas últimas eleccións, de setembro de 2016, non admitiu a candidatura do sindicato Fetico, que apoiaba a dirección". En concreto, explica que a decisión se adoptou porque esta candidatura se presentou fóra de prazo.

Agora, a Sala do social do Tribunal Superior de Xustiza de Galicia (TSXG) dálle a razón ao traballador no recurso que interpuxo e revoga a sentenza dun xulgado de Primeira Instancia "que tan só considerou o despedimento como improcedente", engade a central sindical.

Desde CIG-Servizos sinalan que este caso "ilustra o proceder de determinadas empresas que entenden que os órganos de representación teñen que ser apéndices dos departamentos de recursos humanos e medios de control do persoal e non unha ferramenta dos traballadores e traballadoras para a defensa dos seus dereitos".