O incendio forestal pegado ao Marineda City quedou extinguido con menos de 4 hectáreas
Os medios de emerxencias tiveron que cortar a 3ª Rolda en sentido saída da cidade herculina.
Incendio nas proximidades do Marineda City. Foto: Bombeiros Coruña.
O incendio forestal declarado na tarde do martes nunha zona de monte situada detrás do centro comercial Marineda City na Coruña quedou extinguido tras queimar unhas 3,46 hectáreas.
Segundo os datos facilitados pola Consellería do Medio Rural a Europa Press, o lume comezou ás 16,00 horas do martes na parroquia das Viñas e, tras quedar controlado pouco antes das 18,30 horas, deuse por extinguido ás 22,18 horas.
As estimacións apuntadas por Medio Rural sitúan a superficie queimada por este incendio forestal en 0,52 hectáreas de arboledo e 2,94 de monte raso.
Nas tarefas de extinción participaron dous axentes, seis brigadas, tres motobombas e tres helicópteros. Ademais, foron mobilizados os Bombeiros da Coruña e a Policía Local.
Ademais, o fume causado por este lume forestal provocou o corte ao tráfico da Terceira Rolda na tarde do martes ao non haber visibilidade.
Traballadores contra incendios rodean a Xunta para reclamar unha OPE
Chega o despregamento militar aos montes para disuadir os incendiarios
Escribe o teu comentario