Segundo rescate do verán nas pozas do río Pedras na Pobra

O ferido tivo que ser evacuado en helicóptero. //Foto: Bombeiros Boiro

O helicóptero 'Pesca 1' evacuou na tarde do mércores a un home que resultou ferido nunhas pozas do Río Pedras, no municipio da Pobra do Caramiñal.

Segundo informou o CAE 112 Galicia, o ferido escorregou e magoouse nun pé, polo que non podía abandonar o lugar polos seus propios medios.

Foi o propio home afectado o que chamou ao 112 Galicia ás 18,35 horas do mércores e indicou que estaba ferido e que se atopaba nunha zona de difícil acceso. O venres pasado outro home tivo que ser rescatado nesa zona.

Tras iso, informouse a Urxencias Sanitarias de Galicia-061, que mobilizou ata as inmediacións unha ambulancia. Tamén se alertou aos Bombeiros de Ribeira e aos de Boiro, a Protección Civil, á Policía Local, á Garda Civil, a Salvamento Marítimo e ao Servizo de Gardacostas de Galicia.

Unha vez rescatado polo helicóptero dependente da Xunta, o home ferido foi evacuado ao Hospital do Barbanza.