A Confederación Española de Policía ve a Santiago "no punto de mira" de xihadistas

A Confederación Española de Policía (CEP) reclamou "a presenza permanente" dunha Unidade de Intervención Policial (UIP) en Santiago de Compostela por ser esta cidade "un punto estratéxico" que "está no punto de mira do terrorismo xihadista".

A través dun comunicado, a CEP desmentiu ao delegado do Goberno, Santiago Villanueva, quen asegurou o pasado xoves que a cidade de Santiago conta "continuamente" coa presenza de axentes da Unidade de Intervención Policial para tentar preservar a seguridade.

Deste xeito, sinalan que a UIP "non está continuamente en Santiago" e matizan que non reclaman que a capital galega conte cunha unidade propia, senón que deben dotarse de "máis medios, persoal e zonas ben habilitadas para adestramentos" nas xa existentes en Galicia, con base en Vigo e A Coruña.

"Por iso reclamamos desde este sindicato a presenza da UIP permanentemente nesta cidade, por ser un punto estratéxico, xa que é un dos centros de peregrinaxe máis importantes do mundo occidental, feito polo cal está no punto de mira do terrorismo xihadista", afirman no comunicado.