O autobús transfóbico de Hazte Oír fai unha parada en Galicia
A plataforma paseouno por Santiago e tiña a intención de plantalo no Obradoiro, pero non tiñan permiso.
O bus, parado preto do Parlamento.
A plataforma 'Hazte Oír' paseou este xoves o seu polémico autobús polas rúas de Santiago de Compostela, onde representantes da asociación rexistraron escritos nas sedes do Parlamento galego e o concello para reclamar "a fin do adoutrinamento sexual nas aulas".
A intención da plataforma era que o autobús chegase ata a Praza do Obradoiro, para o que é preciso pedir permiso ao goberno local xa que se trata dun espazo limitado ao acceso de vehículos. Tanto o permiso para acceder á praza como para parar fronte ao Parlamento de Galicia foron denegadas polo Concello de Santiago, segundo publicou o consistorio local a través da súa conta de Twitter.
Á súa chegada á sede do Concello de Santiago, situada na Praza do Obradoiro, unha decena de persoas recibiron os representantes de Hazte Oír con berros de "fóra transfobia de Galicia", "fascistas", "homófobos", "misóxinos" e "ignorantes".
Unha concentración á que se foron sumando máis persoas a medida que os membros da plataforma se desprazaban ata o rexistro do concello compostelán, xa que este non se atopa na Praza do Obradoiro senón nunha rúa próxima.
MANIFESTO NO PARLAMENTO
En concreto, a plataforma reclama a derrogación da 'Lei de igualdade de trato e a non discriminación de lesbianas, gais, transexuais, bisexuais e intersexuales en Galicia', aprobada en 2014 e que abarca diferentes ámbitos como o policial e xudicial, o laboral, familiar, sanitario, educativo, deportivo, cultural ou da comunicación.
Nela, a Consellería de Educación comprométese a "incorporar a realidade" das diferentes orientacións e identidades sexuais "nos contidos transversais de formación de todo o alumnado de Galicia", así como a visibilizar nos centros educativos "os diferentes modelos de familia" establecidos na mesma lei.
"INFLUENCIAR E CONFUNDIR"
Segundo o portavoz da plataforma, esta norma "busca influenciar e confundir" os alumnos "dicíndolles que deben reformularse a súa identidade sexual". "Pensamos que lles corresponde aos pais educar os nenos segundo as súas propias conviccións", din.
"AUTOBÚS DA VERGOÑA"
As asociacións Arelas, Amizando e Ultreia LGTBI, que traballan no ámbito do colectivo transexual, criticaron este xoves o paso do autobús de Hazte Oír por Santiago de Compostela, ao que acusaron de "esparcir o odio" e avanzaron mobilizacións.
A través dun comunicado, as entidades mostraron a súa "repulsa" pola chegada a Santiago deste "autobús da vergoña" que, para eles, forma parte dunha campaña "homófoba e transfóbica".
A maiores, consideran que as mensaxes desta organización "negan o feito trans como condición humana, esparcen o odio e a discriminación contra as persoas trans" e "agravan" a súa situación, xa "bastante vulnerabilizada de seu".
Escribe o teu comentario