O PSdeG propón eliminar os aforamentos dos deputados no Parlamento galego
Os socialistas queren que esta cuestión "se aborde" na reforma do Estatuto | Levarán a medida á Cámara galega, onde esperan que "todos os grupos políticos" se adhiran á petición.
O PSdeG propuxo que se eliminen os aforamentos dos deputados no Parlamento galego como medida para crear un "cordón sanitario" ante casos de corrupción e para que os parlamentarios se enfronten á xustiza en igualdade de condicións que todos os cidadáns.
Así o anunciou o deputado do PSdeG, Juan Díaz Villoslada, este mércores en comparecencia de prensa, avanzou que o grupo socialista levará a medida á Cámara galega, onde espera que "todos os grupos políticos" se adhiran á petición.
Unha medida que implicaría "modificar o artigo 11" do Estatuto de Autonomía de Galicia. "A iniciativa é a de pedir un posicionamento da cámara sobre esta cuestión, para que cando se aborde a reforma do Estatuto estea sobre a mesa", apostilou.
Así, suprimir os aforamentos dos deputados no Pazo do Hórreo é, en opinión de Villoslada, unha medida de "máxima necesidade" para a loita contra a corrupción, unha "tremenda secuela" que está "a minar a confianza dos cidadáns e a calidade democrática do país".
O socialista asegurou que a cidadanía percibe "como un privilexio" a condición dos representantes públicos como aforados, que responde a "outras épocas" e a "outros sistemas que non teñen madurado democraticamente".
"A situación en Galicia é de consolidación do Estado de Dereito e do sistema democrático", opinou Villoslada.
Escribe o teu comentario