Xurxo Rodríguez substitúe a Luís Seara como novo responsable local do BNG en Ourense

Xurxo Rodríguez foi elixido pola militancia como novo responsable local do #BNG en Ourense, substituíndo a Luís Seara, que é portavoz municipal da formación nacionalista no Concello.

Nunha rolda de prensa, o portavoz municipal e anterior responsable local sinalou a importancia de non facer cambios "en tempo de tribulación", e subliñou que as mellores decisións tómanse "desde a serenidade" e a "reflexión colectiva". "Isto é o que fixo o BNG", incidiu, antes de pór en valor a "cohesión" da organización e de apuntar que "agora é o momento de acometer cambios".

Luís Seara explicou que, xa hai semanas, trasladou a necesidade de "facer axustes" e de substituírlle como responsable local, nunha "decisión meditada" para non acumular cargos e para "apostar por persoas novas que veñan cun novo empuxe".

Así, a militancia apostou por Xurxo Rodríguez, unha persoa "nova" pero que coñece a organizaicón e o traballo no Concello, onde traballa como auxiliar no grupo municipal do BNG.

O novo responsable local agradeceu a "confianza" dos seus compañeiros de organización e puxo en valor o traballo do Consello Local saínte. "Iniciamos unha nova etapa. Temos por diante moitos retos", proclamou.

Segundo subliñou, a data das próximas eleccións municipais, en maio de 2027 "si nada se torce", obriga a traballar "xa" de maneira "intensa" para chegar á cita coas urnas "nas mellores condicións posibles". "O obxectivo do BNG vai ser conseguir a Alcaldía de Ourense", avanzou, e apostou por traballar para non "defraudar" ao ourensán que teñen as súas expectativas postas nos nacionalistas, e que están "fartos do que está a acontecer", e queren pór fin "a esta 'longa noite de pedra'" na cidade.

Ademais de Xurxo Rodríguez, licenciado en Ciencias Políticas e da Administración pola USC, formarán parte do Consello Local do BNG en Ourense Daniel Gómez, Rhut Mariña Reza, Erea Branco, Xosé Manuel Puga, Sonia Albor, Rubén Requeixo, Inma Campos, Manuel María Carniceiro 'Queni', Araceli Carragal, Anxo Varela, Lea García, Xosé Fernández, Noa Presas, Iago Tabarés, Xan Sabuz, e Xosé Luís Seara.