O Tribunal Europeo admite a demanda das vítimas de Angrois contra España e a falta dunha investigación independente

A Asociación Plataforma Vítimas do Alvia 04155 leva anos demandando ao Estado unha investigación independente para esclarecer que ocorreu aquela fatídica tarde do 24 de xullo de 2013 en Angrois . En todo este tempo, e tras a celebración do xuízo, a entidade segue reclamando esta investigación, solicitude que mesmo levou a Estrasburgo e que agora recibiu a admisión por parte do Tribunal Europeo de Dereitos Humanos. 

UN "ÉXITO" CONTINENTAL

Trátase dun verdadeiro "éxito" para o colectivo pois, apuntan, o Tribunal "admite menos do 5% das demandas presentadas", tal e como revelan datos do Consello Xeral da Avogacía Española. Supón, nese sentido, un paso máis no pulso que manteñen co Goberno de España, aínda que desde o accidente as administracións variaron en todo este tempo, tras o paso de catro gobernos e cinco ministros de Fomento.

Antonio Benítez Ostos, avogado da asociación, subliña a importancia de que "Europa decida revisar a actuación levada a cabo pola xurisdición española", pois se trata de "o accidente ferroviario máis grave da democracia". "Esperamos obter unha resolución favorable que ordene ao Estado a realizar unha nova investigación independente. Dada a complexidade do asunto e a inexistencia de precedentes, que polo menos eu coñeza, considero que as vítimas do Alvia están a facer historia nesta loita xudicial", manifesta o letrado.

"Os antecedentes da citada demanda, parten da denuncia interposta en xullo de 2021 ante la Sala do Contencioso-Administrativo do TSJM ao Goberno e ao comité que investigou a traxedia. Solicitabamos que levase a cabo unha nova Investigación Independente que cumprise cos requisitos legalmente establecidos: o trámite de audiencia ás vítimas e que atendese as graves deficiencias sinaladas pola Comisión Europea, nun informe da Axencia Ferroviaria Europea", detallan desde a asociación.

Así, e unha vez que esgotaron todas as vías posibles na xustiza española, o seguinte paso foi ir á xustiza comunitaria, onde agora tratarán o seu caso logo de ser admitida a demanda e emitir un ditame sobre "si e estado Español respectou e tutelou os dereitos das vítimas e os seus familiares". 

RECADO A PONTE

"Di moi pouco das nosas institucións e dos nosos gobernantes que aínda non se realizase a investigación independente que solicitou a UE reiteradamente", reprende o colectivo no seu comunicado, o tempo que lembra que levan unha década esperando por esa investigación técnica. Na mesma liña, censuran ao ministro de Transportes Óscar Puente, ao que acusan de "non dar a cara" e "#negar" a recibir aos afectados. 

"Un ministro que despreza aos usuarios do ferrocarril e á súa seguridade, e que como alcalde de Valladolid aprobou en 2016 unha moción para “instar o goberno a constituír unha comisión de investigación composta por expertos e técnicos independentes” é un acto máis de hipocrisía", engaden, considerando que as motivacións para non realizar a investigación son "evitar calquera tipo de responsabilidade política e contaminar á opinión pública para ocultar a verdade, as neglixencias e os incumprimentos normativos de seguridade".