Pedro Sánchez, o apéndice de Podemos

Finalmente, o Comité Federal do PSOE deu xa data para a celebración das primarias, o próximo 21 de maio, como xa se sabía. Susana Díaz e Patxi López asistiron ao mesmo; o ausente, Pedro Sánchez, o amnésico. Por que a súa fuxida? Ten medo a dar contas? A que ninguén fale con el? Ou sinxelamente que pasa do PSOE do século XX como agora predica a todo aquel que o queira oír.

Nas campañas electorais adóitanse dicir moitas bobadas co fin de conseguir adeptos á causa do que as di. Ocorre despois que as hemerotecas recompilan e gardan todas as cousas que se dixeron. Son unha xoia que axudan a lembrarlles aos "amnésicos" que renegan ou cambian o discurso. Moitas das opinións de outrora se se comparan coas posicións de agora poden producir un ataque de risa porque onde dixo digo agora manifesta o contrario. É como unha 'evolución' ideolóxica, que dirían algúns.

Pedro Sánchez, o primeiro candidato que se postulou para as primarias do seu partido, mirando a "chivata", cando se presentou ás anteriores gañounas grazas a Susana Díaz, que apostou por el e non por Madina -agora Madina apoia a Susana Díaz-. Os dous enfrontados agora dábanse grandes abrazos. "Susana Díaz é unha líder fóra e dentro do PSOE. Sempre dixen que o socialismo andaluz debe ser central no proceso de cambio e ela é un dos principais activos", dicía Sánchez sobre a presidenta andaluza. Utilizou os prohomes do seu partido para facerse coa vitoria. Agora, nos seus mitins, fala deles e do partido que se envorcou con el como o PSOE do século XX e que el representa o do século XXI. Ou sexa que antes valían e agora son antigos e non valen. En que quedamos? A xente ten memoria e, se non, fai uso das hemerotecas, gardián implacable das accións, comentarios, postulados, sandeces múltiples e mentiras que se chegan a dicir.

Pedro Sánchez, o moderno e innovador, quere facer, con enganos, un PSOE apéndice de Podemos, sen ter en conta a distancia ideolóxica que separa as dúas formacións. O que queda claro é que, Pedro Sánchez, co seu "xogo" está a facer dano ao partido que di defender. A crise do PSOE non a vai remontar Pedro Sánchez, por moito que o diga, máis ben ao contrario. Coa súa actitude e as súas políticas camufladas de máis esquerdosas o que esconde sinxelamente é unha loita polo poder, así de sinxelo. O resultado final, unha brecha nun PSOE que aínda non saíu da UVI. 

(Artigo publicado orixinalmente en CatalunyaPress)