Volven facer pintadas na sede galega de Ciudadanos en Santiago

Ciudadanos Galicia denunciou este mércores un novo ataque contra a súa sede, algo que o seu portavoz, Javier Sánchez-Agostiño, ve "un ataque á democracia".

"O que temos que facer, en contra do que queren, que é calarnos, é seguir traballando con máis forza", proclamou Sánchez-Agostiño a través dun comunicado.

Na cristaleira da sede do partido laranxa pódese ler unha pintada que reprocha: 'Moita sede para tan poucos escanos'. Ademais da cristaleira, provocaron danos na pedra, tal e como ensinou Ciudadanos Galicia a través da súa conta de Twitter.

Ante o segundo ataque en seis meses que sofren as oficinas situadas na compostelá avenida de Ferrol, Ciudadanos presentou unha denuncia ante a Policía Nacional.