O alcalde de Noia ponse a contar 'chistes' machistas no acto do 8 de marzo

|

Alcaldenoiamachismo


Bendicido polo don da oportunidade, o alcalde de Noia non tivo mellor idea que poñerse a contar 'chistes' machistas no acto institucional que a localidade dedicou ao Día Internacional da Muller Traballadora. Santiago Freire, rexedor do partido popular, encadeou ata tres comentarios machistas do tirón, avisando de que recorría ao "chiste fácil": "A muller é capaz de sangrar sen cortarse, é capaz de dar a luz sen corrente e algúns din que é capaz de tocar os narices sen sequera achegarse".


E se era pouco xardín no que se metía, seguiu afondando en supostas desvantaxes biolóxicas nas que o machismo xustifica a 'debilidade' feminina: "O certo é que son moitas as complexidades e dificultades fisiolóxicas que ten con respecto ao home e que en ocasións ese traballo que teñen de desenvolver no día a día, traballos que requiren forza física se lle complique".



Ante semellante discurso, a oposición (PSdeG, Marea Cidadá de Noia e BNG) manifesta a súa indignación e difundiu o vídeo onde o alcalde se retrata. Este xoves teñen previsto reunirse para debater sobre accións que levarán a cabo.


O ALCALDE "DOÍDO" E "ARREPENTIDO"


Santiago Freire pediu "perdón" polas súas "desafortunadas palabras" e desculpouse ante "as persoas que se sentiron ofendidas" nun comunicado remitido aos medios este xoves.


"Foi un minuto fatal nun discurso no que, lonxe de querer atacar ás mulleres, o que quería era mostrar a miña máxima admiración á súa figura", asegurou.


Así mesmo, Freire incidiu no papel "fundamental" que desempeñan as mulleres en calquera ámbito da vida e, produto deste recoñecemento, o alcalde de Noia mostrouse "moito máis doído e arrepentido" pola polémica que provocaron as súas palabras.

relacionada As rúas claman por que "todas as mulleres sexan donas da súa vida"
relacionada Cancelan en Vigo un espectáculo de Jorge Cremades polas súas declaracións machistas

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress