Polo menos 30 dos parlamentarios galegos decláranse antitaurinos

|

Touros 3


A Fronte Antitaurina, iniciativa da asociación abolicionista 'Galicia, Mellor Sen Touradas', aumentou os seus apoios no Parlamento galego nesta lexislatura, ata obter o respaldo de 30 deputados, o que supón un incremento do 10 por cento con respecto ao apoio da anterior cámara --nela contaban co respaldo de 27 representantes--.


Segundo informou a propia organización este domingo a través dun comunicado, a Fronte Antitaurina contan co apoio do grupo parlamentario de En Marea --con 14 deputados-- e do BNG --con seis--, así como con 10 dos 14 parlamentarios do PSdeG. Así mesmo, 'Galicia, Mellor Sen Touradas' asegurou que "convidarán os representantes" do Partido Popular a sumarse a esta causa.


O aumento dos apoios parlamentarios aos abolicionistas foi parello a un descenso do respaldo municipal aos eventos de carácter taurino. Así, mentres que en 2012 eran cinco as localidades que albergaban algún tipo de evento taurino --A Coruña, Pontevedra, Triacastela (Lugo), Padrón (A Coruña) e Valga (Pontevedra)--, actualmente só dúas delas continúan permitindo estas prácticas --Pontevedra e Valga--.


Ademais, segundo apuntaron os abolicionistas, "Galicia é unha das comunidades con menor seguimento da tauromaquia". Citando datos do Ministerio de Cultura, a plataforma indicou que "só o 0,3 por cento da cidadanía declara asistir a corridas ou becerradas".


A plataforma explicou que o seu principal obxectivo actualmente é o de "exercer de contrapoder ao menguante, pero aínda poderoso, lobby taurino". Neste sentido, 'Galicia, Mellor Sen Touradas' sinalou que a sentenza do Tribunal Constitucional sobre a ILP (Iniciativa Lexislativa Popular) antitaurina catalá "tamén obrigou a reformularse determinadas estratexias".


En definitiva, as actuacións da fronte concretaranse en "toda clase de iniciativas" dos grupos políticos ao pleno e ás diferentes comisións parlamentarias.

Sen comentarios

Escribe o teu comentario




He leído y acepto la política de privacidad

No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress