Ourense pide á Xunta non esperar ás medidas que ordene Madrid contra a praga da pataca

A Deputación de Ourense aprobou por unanimidade unha moción para instar á Xunta a "adoptar un plan específico" para o control da polilla guatemalteca da pataca coa intención de que esta praga non chegue á provincia; en especial á comarca da Limia, onde anualmente se cultivan máis de once millóns de quilos deste tubérculo.

A proposta do BNG aprobada este venres no pleno da Deputación provincial insta á Xunta a non esperar a regulamentación do Ministerio de Agricultura en Madrid e poñer en marcha "unha campaña cos medios materiais e económicos" precisos para a súa erradicación.

Así o reclamou o portavoz nacionalista, Ramiro Rodríguez, que alertou que xa pasaron dous anos desde a detección desta praga sen que se puidese deter a súa expansión.

MEDIDAS DE CONTENCIÓN "INSUFICIENTES"

Para o portavoz nacionalista as "medidas de contención" chegaron tarde ou reveláronse "insuficientes", xa que neste período a polilla guatemalteca pasou de afectar a tres concellos a 31 no norte da Coruña e A Mariña luguesa.

Na actualidade o Ministerio de Agricultura ultima un decreto, cuxa aprobación está prevista no prazo de dous meses, para prohibir a plantación do tubérculo nos municipios afectados e establecer medidas para o control da praga.

Rodríguez lembrou que, á espera deste decreto "todos os axentes implicados" critican a falta de información sobre que medidasse teñen que poñer en marcha e quen debe correr cos gastos.

Por iso, pediu ao goberno de Alberto Núñez Feijóo que poña fin á "política de brazos cruzados á espera de Madrid". Nesta liña tamén se expresan as emendas ao texto presentadas polos socialistas e que foron aprobadas por unanimidade.

RECLAMACIÓN AO GOBERNO CENTRAL

Deste xeito "esixen" ao Goberno de España a publicación "urxente" do decreto para regular o control da praga e á Xunta a posta en marcha de "medidas" para evitar a propagación na provincia de Ourense.

Tamén se aprobou, a instancias do PSOE, que a Deputación realice traballos de análises e asesoramento técnico a través do Centro de Desenvolvemento Agrogandeiro; así como a posta en marcha dunha campaña de información a todos os sectores implicados.

O portavoz de Democracia Ourensana (DO), Armando Ojea, insistiu na necesidade de establecer "normas claras" que eviten a aparición de "bulos e rumores" que "aumentan a preocupación" no sector e pediu "présa" para "evitar que a especie se poida aclimatar" a Galicia.

Deste xeito, saíu ao paso das declaracións da portavoz 'popular' Montserrat Lama, que insistiu en que na actualidade a polilla está a expandirse nos concellos situados preto do mar, nos que hai temperaturas máis suaves.

O CLIMA DE OURENSE, "BARREIRA NATURAL"

Lama destacou que as condicións naturais da provincia, especialmente na zona da Limia, con invernos fríos actúan a modo de "barreira natural".

A pesar diso, tanto a Xunta como a Deputación "están a tomar medidas anticipadas" ao Real Decreto, segundo insistiu Lama, que tamén reclamou que non se cre "alarmismo" na provincia. "Non se detectou ningunha polilla guatemalteca nas análises da provincia de Ourense", declarou de forma tallante.