UXT Ourense demandará a ADIF polos -6º que soportan os vixiantes de seguridade de Control
O Sector de Seguridade e Servizos Auxiliares da Federación de Servizos, Mobilidade e Consumo de UXT (FeSMC-UXT) denunciou a “inacción” de ADIF ante as condicións térmicas extremas que padecen os vixiantes de seguridade destinados na estación intermodal de Ourense. Tras a celebración do acto de conciliación ante o SMAC, o sindicato confirma que non se alcanzou acordo algún e anuncia o inicio de accións xudiciais contra o administrador ferroviario.
Durante a conciliación, só compareceu a representación legal de Grupo Control, contratista do servizo de seguridade, mentres que ADIF non se presentou. Segundo o sindicato, esta ausencia “evidencia unha absoluta falta de responsabilidade cara aos traballadores” que desempeñan o seu labor nas instalacións.
De acordo con UXT, a avogada de Grupo Control recoñeceu que “ADIF non nos permite realizar ningún tipo de obra”, afirmación que, segundo o sindicato, confirma que o problema é estrutural e competencia directa de ADIF.
Os vixiantes da estación chegaron a soportar temperaturas superiores a 40 °C no verán e sensacións térmicas por baixo de 6 °C no inverno, o que vulnera o Real Decreto 486/1997 sobre seguridade e saúde nos lugares de traballo e a Lei de Prevención de Riscos Laborais.
UXT lembra que, en xullo de 2025, o Xulgado do Social núm. 1 de Ourense ratificou a sanción imposta pola Inspección de Traballo a Grupo Control por non protexer adecuadamente aos seus vixiantes ante o risco térmico, nun expediente iniciado por denuncia sindical en 2023.
A pesar desa resolución, a organización denuncia que a situación “empeorou” e que ADIF segue sen adoptar medidas. Por iso, UXT presentará unha demanda xudicial na que esixirá:
Unha avaliación actualizada do risco térmico segundo o RD 486/1997.
- A execución inmediata de obras estruturais nas instalacións.
- A garantía de condicións laborais seguras.
- A depuración de responsabilidades por incumprir o deber de protección.
“O risco térmico está plenamente acreditado e existe unha sentenza firme que o confirma”, declarou Alberto Díaz, responsable do sector de Seguridade e Servizos Auxiliares de FeSMC-UXT Ourense. “Que nin sequera se presenten ao SMAC demostra unha falta absoluta de respecto cara aos traballadores. UXT vai chegar até o final para garantir condicións dignas na estación”, engadiu.
O sindicato esixe unha actuación inmediata de ADIF e reclama que deixe de impedir as obras necesarias para pór fin a unha situación “incompatible coa saúde e a seguridade laboral” nun edificio público. ADIF non respondeu por agora publicamente ás críticas do sindicato.
Escribe o teu comentario