O PP ratifica o seu rexeitamento a investigar o accidente do Alvia no Parlamento


|

Vitimasangrois 1


O portavoz parlamentario do PPdeG, Pedro Puy, ratificou este luns o rexeitamento do grupo maioritario a abrir unha comisión de investigación no Pazo do Hórreo sobre o accidente ferroviario de Angrois, á vez que lembrou que o Regulamento da Cámara obriga a activala automaticamente no caso de que o soliciten 30 deputados de distintos grupos.


En concreto, tras a última reforma da normativa parlamentaria, a oposición pode forzar unha comisión de investigación por lexislatura aínda sen contar coa maioría absoluta. Constituirase sempre que así o pidan un terzo dos deputados (25) que pertenzan a un mesmo grupo ou, na súa falta, as dúas quintas partes (30) se forman parte de forzas diferentes.


No caso desta nova petición de investigación parlamentaria sobre o sinistro acaecido o 24 de xullo de 2013, parte de En Marea, con 14 deputados, e o BNG, con seis. Por tanto, faría falta, polo menos, a firma de 10 dos 14 representantes do PSdeG no Pazo do Hórreo. O portavoz socialista, Xoaquín Fernández Leiceaga, xa avanzou que non ve "oportuno gastar a única bala de prata" ao comezo da lexislatura e nunha cuestión de competencia "exclusiva" do Estado.


OPOSICIÓN DO PPdeG


Precisamente esa idea é a que leva aos populares, segundo reiterou Pedro Puy en rolda de prensa, a opoñerse á súa creación, por entender que un órgano destas características nun parlamento autonómico "non levaría a ningunha conclusión". Ao seu xuízo, o que procede é demandar do Estado "un informe incontrovertido" sobre as causas do sinistro.


Tras lembrar que o emitido pola Comisión de Investigación de Accidentes Ferroviarios (CIAF) foi posto en cuestión pola propia Unión Europea, o dirixente popular reafirmou o "apoio" e a "solidariedade" da súa formación coas vítimas e as súas familias e fixo votos por que "se coñeza a verdade" sobre as causas "coadxuvantes" do "dramático e lamentable" sinistro.



RUEDA RECIBIRÁ ÁS VÍTIMAS


Doutra banda, o vicepresidente da Xunta, Alfonso Rueda, avanzou que recibirá este martes, día 21 de febreiro, ás vítimas do accidente ferroviario de Angrois agrupadas na plataforma Alvia 04155 que, coincidindo coa nova celebración do debate parlamentario ao redor da creación dunha comisión de investigación sobre o sinistro, solicitaron ao presidente do Executivo autonómico unha reunión.


Rueda explicou que, aínda que a solicitude se dirixe ao "presidente da Xunta", na súa ausencia e en virtude das súas competencias de "presidente en funcións", será el mesmo quen reciba ás vítimas.


Ademais, Rueda lembrou que a postura do Goberno galego sobre a comisión de investigación "é coñecida". "Non lles vou a dicir unha cousa diferente do que mantivo o Goberno da Xunta pero, por suposto, a nosa obrigación é recibilos e fareino sen ningún problema", manifestou.


FEIJÓO REINCORPORARASE ESTA SEMANA


Rueda prevé que esta mesma semana o xefe do Executivo autonómico, Alberto Núñez Feijóo, reinicie a súa incorporación paulatina á actividade diaria tras uns días ausentes pola súa recente paternidade e xa acuda o mércores á sesión de control no pleno do Parlamento.


"Dáme a impresión de que vai estar", apuntou, apelando a que hai sesión de control ao presidente o vindeiro mércores, cando se cumprirá unha semana do nacemento do seu fillo Alberto.


Feijóo non se acollerá á súa baixa por paternidade pero si avanzou que estaría uns días ausente polo nacemento do seu bebé e que a súa incorporación aos actos públicos sería paulatina.

relacionada O Parlamento volve debater crear unha comisión de investigación de Angrois
relacionada Vítimas do Alvia piden reunirse coa Xunta sobre a comisión de investigación
relacionada A Eurocámara reclama unha investigación "independente" do accidente de Angrois

Sen comentarios

Escribe o teu comentario




He leído y acepto la política de privacidad

No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress
CLABE