O Celta volve caer ás portas da final de Copa

|

CeltistasMazazo para a afección celeste. //Fonte: RC Celta


Coma o ano pasado, o Celta queda de novo en semifinais de Copa, superado por un Alavés que non outorgou concesións e que se mete na final por primeira vez nos seus 96 anos de historia.


O balón botou a rodar en Mendizorroza e o Alavés non dubidou. Os vascos saíron a por todas ante un Celta que non carburaba. Nos primeiros compases do encontro os branquiazuis apertaron e roldaron a portería de Sergio con perigo. No medio desta situación adversa o Celta ganduxou unha boa xogada finalizada por Iago Aspas na área arabesa e na que Pacheco apareceu, salvador, para despexar un balón que parecía destinado a converterse en gol.


Mediado o primeiro tempo chegou a réplica local. Ibai lanzou unha falta directa ao bordo da área e enviou o esférico rozando a cruceta. A ocasión pareceu dar ás ao Alavés, que volveu gozar dunha fase na que apertou ao Celta. E de novo, cando máis falto de ideas semellaba o Celta, apareceu Iago Aspas. O moañés golpeou de primeiras un balón solto tentando sorprender por arriba a Pacheco, adiantado, pero o balón marchou fóra rozando o traveseiro.


Tras a continuación, superioridade do Alavés. O cadro adestrado por Pellegrino fallaba na finalización, pero mantiña o dominio e xeraba as mellores ocasións. No minuto 64 paradón de Sergio para evitar o gol de Ibai. O partido entrou nunha dinámica intermitente na que o Celta non lograba atopar o camiño á portería rival, incapaz sequera de reter o balón controlado. E finalmente, despois de moito avisar, o Alavés marcou a dez minutos para o asubío final.


O Celta apertou ata o último minuto pero o gol non chegou e o equipo celeste quedou ás portas da final da Copa do Rey.

relacionada Mendizorroza decide esta noite quen pelexará pola Copa contra o Barça
relacionada O Celta viaxa con todo, lesionados incluídos, a pola semifinal de Copa

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress