Catro colexios están este luns pechados

Os danos causados polo temporal de vento e choiva que afectou nos últimos días á Comunidade galega debido ao paso de varias borrascas deixou este luns sen clase a estudantes de tres colexios galegos e os alumnos de Secundaria dun cuarto.

Segundo informaron a Europa Press fontes da Consellería de Educación, o IES Chan do Monte de Marín (Pontevedra) permanece sen clase este luns debido aos danos rexistrados na cuberta, que se procederon a reparar.

Tamén o CPI Antonio Orza de Boqueixón (A Coruña) sufriu danos na cuberta, polo que os alumnos de Secundaria do centro quedaron sen clase este luns.

Pola súa banda, o CEIP Ramón Otero Pedrayo da Laracha (A Coruña) permanece sen clase este luns tras caer o lucernario debido ao mal tempo dos últimos días.

Fontes de Educación explicaron que se traballa para que os alumnos deses centros poidan volver "canto antes" ás aulas. No caso concreto de Boqueixón está previsto que o martes se distribúan os estudantes no centro de primaria.

A eses tres centros públicos súmase o colexio privado Virxe Milagrosa da localidade pontevedresa de Bueu, que tampouco ten clase este luns por problemas causados pola auga nas instalacións.

ÁRBORES CAÍDAS

Tras o temporal rexistrado en días pasados, Galicia vai recuperando a normalidade e o 112 Galicia non rexistrou nas últimas horas incidencias destacadas.

Deste xeito, as rabexadas do mal tempo deixaron incidencias como caídas de árbores e ramas nalgúns puntos da comunidade nunha xornada na que o nivel de risco baixou a amarelo polo vento no mar e as ondas.