O temporal comeza a irse, pero aínda queda algunha rabexada
A alerta baixa do nivel laranxa ao amarelo e a situación continúa complicada sobre todo polo vento e polas ondas no litoral.
O temporal que azoutou estes últimos días a Comunidade galega baixa de nivel laranxa a nivel amarelo na xornada deste luns, na que persistirá o vento no mar e as ondas, segundo a información de Meteogalicia.
O temporal causou cuantiosos danos, rexistrándose múltiples incidencias nas catro provincias. Ademais, tamén ocasionou problemas na subministración eléctrica e no servizo da auga.
De feito, o PSdeG pediu que a Xunta ofreza "tan pronto como sexa posible" un balance dos danos ocasionados polo temporal e anunciou que poñerá en marcha unha batería de iniciativas para reclamar un plan de axudas.
AVISOS EN 11 PROVINCIAS
Mantéñense os avisos en 11 provincias, especialmente por vento, podendo chegar a refachos máximos de ata 100 quilómetros por hora. O Leste peninsular está en situación de risco importante (laranxa) polo vento, nivel que descende a amarelo no caso da Coruña, Lugo e Baleares.
As precipitacións comezarán a dar paso a ceos nubrados ou con intervalos nubrados, coa excepción de Galicia, a área do Cantábrico e Pireneos, onde persistirán. A cota de neve situarase entre os 800 e os 1.000 metros nas montañas do norte peninsular, subindo cara ao final da xornada a entre os 1.500 e os 1.700 metros.
O ceo mostrarase nubrado ou cuberto no Cantábrico oriental e en Pireneos, mentres que en Galicia predominarán os intervalos nubrados con choivas, nalgúns momentos intensas, que poderían estenderse á cordilleira Cantábrica e ao norte de Castela e León.
O vento será de compoñente oeste na vertente atlántica e cantábrica, e do noroeste no terzo oriental peninsular e en Baleares. Ventos especialmente fortes en Galicia, en Pireneos, no Empordán, na desembocadura do Ebro e en Baleares.
Escribe o teu comentario