Pontevedra prepárase para 48 horas de folga no sector do metal, coa solidariedade do comercio do metal

Este mércores arrinca o primeiro dos dous días de folga no sector do metal programados para esta semana na provincia de Pontevedra. Trátase, atendendo ao calendario de mobilizacións, da segunda das seis xornadas de paro programadas na provincia polos sindicatos CIG, CC.OO. e UXT, que ante os nulos avances na mesa de negociación por un novo convenio saen á rúa de maneira masiva para defender condicións e salarios dignos no colectivo, que abarca grupos variados que van desde os soldadores até os mecánicos. 

MÁIS UNIDOS QUE NUNCA

Vigo volveu ser o centro de todas as miradas cunha marcha tan multitudinaria como a da semana pasada. A resposta dos traballadores está a ser unánime, reclamando un convenio onde contemplen todas as necesidades dun sector onde a precariedade e o perigo forman unha tráxica alianza en moitas empresas. 

Non se trata do paro máis longo, en calquera caso. Aínda que a folga durará 48 horas entre os que a secunden este mércores e mañá xoves, o "prato forte" terá lugar, se nada o remedia, a próxima semana, con 72 horas de paro os días 19, 20 e 21, coincidindo coa celebración no Ifevi da feira Navalia. 

Tampouco será Vigo o único lugar onde se están dando as protestas, pois en Pontevedra, Vilagarcía ou Lalín tamén hai programadas concentracións de operarios do sector do metal, que contan co respaldo do comercio do metal, que tamén acode a estes paros e que tamén está chamado a mobilizar mañá. 

No comercio do metal a problemática é idéntica, con meses de negociación por un convenio que non termina de pactar pese que a 10.000 traballadores están á espera de cambios nun acordo caducado desde hai xa ano e medio. A pretensión dos empresarios de eliminar a cobertura do 100% desde o primeiro día en caso de baixa por incapacidade temporal dinamitou todas as conversacións cos sindicatos, que se levantaron da mesa ante a proposta.
 

"A patronal pretende suspender durante dous anos a aplicación do artigo que impide que as empresas poidan absorber os pluses que superen as condicións salariais fixadas en convenio", engaden desde a CIG, que convocou aos traballadores á folga destes días.